ИИВ ҳузуридаги Жазони ижро этиш департаменти делегацияси МДҲ пенитенциар хизматлари раҳбарлари Кенгашининг XI йиғилишида иштирок этди
2026-09-18 12:00:00 / Янгиликлар
ИИВ ҳузуридаги Жазони ижро этиш департаменти делегацияси Россия Федерациясининг Қозон шаҳрида бўлиб ўтган Мустақил Давлатлар Ҳамдўстлиги иштирокчи-давлатлари пенитенциар хизматлари раҳбарлари Кенгашининг навбатдаги XI йиғилишида иштирок этди.
2025 йилда Тошкент шаҳрида ўтказилган Кенгашнинг Х йиғилишида қабул қилинган қарорга мувофиқ, Кенгашнинг навбатдаги XI йиғилиши ИИВ ҳузуридаги Жазони ижро этиш департаменти бошлиғи раислигида ўтказилди.
Унда Арманистон, Беларусь, Қозоғистон, Қирғизистон, Россия Федерацияси ва Тожикистон пенитенциар хизматлари раҳбарлари, МДҲ Ижроия қўмитаси ҳамда Антитеррор маркази вакиллари иштирок этди.
Йиғилишда МДҲ давлатлари пенитенциар хизматлари ўртасидаги ҳамкорликни янада ривожлантириш, соҳадаги илғор тажрибаларни ўрганиш ва амалиётга жорий этиш, кадрлар тайёрлаш, маҳкумларни ахлоқан тузатиш ва ижтимоий ҳаётга мослаштириш, шунингдек, пенитенциар хизмат ходимларини ижтимоий ҳимоя қилиш каби долзарб масалалар муҳокама қилиниб, бу борада 10 та қарорлар қабул қилинди.
2027 йилдан Россия Федерацияси Федерал жазони ижро этиш хизматининг олий таълим муассасаларида МДҲ давлатлари пенитенциар хизматлари ходимлари учун тегишли йўналишларда таълим ташкил этиш, шунингдек, ходимларнинг малакасини ошириш мақсадида масофавий таълим имкониятларини йўлга қўйиш режалаштирилаётгани алоҳида қайд этилди.
Шунингдек, йиғилишда Россия давлат ва сиёсат арбоби, Татаристон Республикаси раиси Рустам Нургалиевич Минниханов сўзга чиқиб, трансмиллий жиноятчиликка қарши курашда саъй-ҳаракатларни бирлаштириш муҳимлигини айтиб ўтди.
Терроризм ва экстремизмга қарши курашиш соҳасида ҳамкорликни мустаҳкамлашга ҳам эътибор қаратилиб, МДҲ Антитеррор маркази билан ўзаро ҳамкорликни янада ривожлантириш, давлатлараро дастурлар доирасида амалга оширилаётган ишлар самарадорлигини ошириш бўйича келишувларга эришилди.
Йиғилиш якунида Кенгашнинг навбатдаги ХII йиғилишини 2027 йилда Беларусь Республикасида ўтказиш тўғрисида қарор қабул қилинди.
Бундан ташқари, хизмат сафари давомида делегация аъзолари Россия Федерал жазони ижро этиш хизматининг Татаристон Республикаси бўйича 1-сон тергов ҳибсхонаси фаолияти билан ҳам танишди.
Муассасанинг замонавий инфратузилмаси, муҳандислик-техник қўриқлаш ва назорат воситалари ҳамда фаолиятини ташкил этиш тажрибаси ўрганилди.
Шунингдек, Россия пенитенциар тизими муассасаларида ишлаб чиқарилаётган қурилиш, мебель, электротехника, махсус транспорт воситалари ва бошқа маҳсулотлар кўргазмаси билан танишилди.
Бу каби учрашувлар МДҲ давлатлари пенитенциар хизматлари ўртасидаги ўзаро ҳамкорликни янада мустаҳкамлаш, тажриба алмашиш ва жазони ижро этиш соҳасини замонавий ёндашувлар асосида ривожлантиришда муҳим аҳамият касб этади.
ИИВ ҳузуридаги Жазони ижро этиш департаменти Ахборот хизмати