Ўзбекистон Республикаси Ички ишлар вазирлиги

Мен Ўзбекистонни, аввало, шу юртда туғилиб-ўсганим, унинг тинч осмони, бағрикенг халқи ва эртанги кунга ишонч билан қадам ташлаётгани учун севаман. Ички ишлар органлари ходими сифатида эса Ватанга бўлган муҳаббатим яна бир юксак масъулият билан бойиган.

Мустақилликнинг дастлабки йилларида ички ишлар органларининг асосий вазифаси мамлакат тинчлиги, жамоат хавфсизлиги ва фуқаролар осойишталигини таъминлашдан иборат эди. Вақт ўтиши билан тизим нафақат жиноятчиликка қарши курашувчи, балки инсон ҳуқуқ ва манфаатларини ҳимоя қилувчи хизматга айланиб борди. Бугунги кунда ҳар бир ходимнинг фаолиятида «Халқ манфаатларига хизмат қилиш» тамойили устувор аҳамият касб этмоқда. Бу ўзгаришлар ички ишлар органлари фаолиятининг ҳуқуқий асосларини мустаҳкамлаш билан бир қаторда, жамоатчилик билан ҳамкорликни ҳам янги босқичга олиб чиқди.

Сўнгги йилларда амалга оширилган ислоҳотлар тизим фаолиятини янада замонавийлаштиришга хизмат қилмоқда. Ахборот технологиялари хизмат жараёнига кенг татбиқ этилмоқда. Биометрик идентификация, рақамли криминалистика, видеокузатув тизимлари, электрон маълумотлар базалари ва интеллектуал таҳлил воситалари ходимларнинг иш самарадорлигини сезиларли оширди. Илгари кўп вақт талаб қилган жараёнлар бугун қисқа фурсатда, аниқ ва шаффоф тарзда амалга оширилмоқда. Бу эса ҳам ходимлар меҳнатини енгиллаштирди, ҳам фуқаролар учун қулайликлар яратди.

Ички ишлар органлари тизимида «Инсон қадрини улуғлаш» тамойили тобора мустаҳкамланмоқда. Маҳаллаларда профилактика ишларининг кучайтирилиши, хотин-қизлар, ёшлар ва нуронийлар билан манзилли ишлаш, ҳуқуқбузарликларнинг олдини олишга қаратилган янги ёндашувлар тинчлик ва барқарорликни таъминлашда муҳим ўрин тутмоқда. Бугун ҳар бир маҳалла хавфсизлиги учун масъул тизим шаклланиб, аҳоли билан мулоқот ва ҳамкорлик кучайди.

Мен ички ишлар органларида хизмат қилишни оддий касб эмас, балки Ватан олдидаги муқаддас бурч деб биламан. Ҳар куни хизмат либосини кийганимда, ортимда бутун халқимнинг ишончи турганини ҳис қиламан. Шу ишонч инсонни янада масъулиятли, виждонли ва фидойи бўлишга ундайди. Зеро, Ватан тинчлигини асраш — катта шараф.

Ўзбекистонни севиш — унинг мустақиллигини мустаҳкамлаш, қонунларига ҳурмат билан қараш ва халқ тинчлигига муносиб ҳисса қўшиш демакдир. Шунинг учун ҳам «Мен нечун севаман Ўзбекистонни?» деган саволга жавобим битта: чунки бу юрт менга эркинлик, шарафли бурч ва халқимга сидқидилдан хизмат қилиш бахтини берган муқаддас Ватандир!

© “Postda” газетаси, Шерзодбек Нуриддинов, Андижон вилояти ИИБ Ахборот хизмати бошлиғи, майор.