Қашқадарё вилояти маҳаллаларида хавфсиз муҳитни таъминлаш бўйича аниқ вазифалар белгиланди
2026-09-13 10:40:00 / Янгиликлар
Ўзбекистон Республикаси Президентининг ПҚ-303-сон ва ПҚ-314-сон қарорларида белгиланган вазифалар ижросини таъминлаш, маҳаллаларда хавфсиз муҳитни яратиш ҳамда жиноят ва ҳуқуқбузарликларнинг барвақт олдини олиш мақсадида Қашқадарё вилоятининг Қарши шаҳри, Касби, Чироқчи ва Яккабоғ туманларидаги криминоген вазияти мураккаб, хусусан, «қизил» тоифага киритилган маҳаллаларда ўрганишлар ўтказилди.
Ўрганишлар давомида ҳудудлардаги криминоген вазият, жиноят ва ҳуқуқбузарликларга сабаб бўлаётган омиллар, мавжуд муаммолар ҳамда профилактик ишларнинг самарадорлиги таҳлил қилинди.
Хусусан, профилактика инспекторлари томонидан фуқаролар мурожаатларини мунтазам таҳлил қилиш, уларнинг келиб чиқиш сабабларини аниқлаш ва ҳар бир мурожаат бўйича манзилли чоралар кўриш зарурлиги таъкидланди.
Шунингдек, муаммоли оилалар, ишсиз фуқаролар, ёшлар, назорат остидаги ҳамда хавф гуруҳига кирувчи шахслар билан индивидуал профилактик ишларни кучайтириш, ҳуқуқбузарликларнинг сабаб ва шарт-шароитларини барвақт аниқлаш ва бартараф этиш бўйича вазифалар белгиланди.
«Қизил» тоифадаги маҳаллалар кесимида мавжуд муаммоларни бартараф этиш бўйича аниқ «йўл хариталари» ишлаб чиқилиб, масъуллар ва амалга ошириш механизмлари белгилаб берилди.
Якунлари бўйича маҳалла еттилиги, профилактика инспекторлари ва ИИБ раҳбарларининг ҳамкорлигини кучайтириш, аҳоли билан очиқ ва манзилли мулоқотни йўлга қўйиш ҳамда жамоат хавфсизлигини таъминлаш юзасидан масъулларга тегишли топшириқлар берилди.
Қашқадарё вилояти ИИБ Ахборот хизмати