Сурхондарёда инсон ҳуқуқларини таъминлаш ва тиббий-профилактик чоралар самарадорлиги ўрганилмоқда
2026-09-11 11:50:00 / Янгиликлар
Бош прокурорнинг биринчи ўринбосари Бахриддин Валиев раҳбарлигидаги Республика идоралараро мувофиқлаштирувчи штаби ва ишчи гуруҳи аъзолари томонидан Президентнинг 2026 йил 5 январдаги ПҚ-1-сон ва ПҚ-2-сон қарорлари ижросини таъминлаш мақсадида Сурхондарё вилоятида ўрганишлар давом этмоқда.
Ўрганишлар доирасида, аввало, инсон ҳуқуқ ва эркинликларини таъминлаш, қонунчилик талабларига сўзсиз риоя этилишини назорат қилиш, фуқаролар учун муносиб шарт-шароитларни яратиш, шунингдек, тиббий-профилактик чора-тадбирларни самарали ташкил этиш масалаларига алоҳида эътибор қаратилмоқда.
Хусусан, Термиз шаҳрида жойлашган тергов ҳибсхонасида сақланаётган шахслар, айниқса, аёллар ва вояга етмаганлар учун яратилган шароитлар атрофлича ўрганилди. Уларнинг ҳуқуқ ва қонуний манфаатларини таъминлаш, тиббий хизмат кўрсатиш, санитария-гигиена талабларига риоя этиш, яшаш шароитлари ҳамда тергов ҳаракатлари жараёнида қонунчилик талабларига амал қилиниши ҳолати таҳлил қилинди.
Ташриф давомида ишчи гуруҳи аъзолари тергов ҳибсхонасида сақланаётган шахслар билан бевосита мулоқот қилиб, уларни қийнаётган муаммоларни ўргандилар. Суҳбатлар давомида яшаш шароитлари, тиббий хизматдан фойдаланиш имкониятлари, тергов жараёни, қаровсиз қолган вояга етмаган фарзандларига васий белгилаш ва бошқа масалалар юзасидан мурожаатлар тингланди.
Ҳар бир мурожаат юзасидан қонуний ечимларни ишлаб чиқиш ва уларни белгиланган тартибда кўриб чиқиш бўйича масъулларга тегишли топшириқлар берилди ҳамда уларнинг ижроси назоратга олинди. Шунингдек, аниқланган камчиликларни бартараф этиш юзасидан масъулларга кўрсатма ва топшириқлар берилди.
Бундан ташқари, тергов ҳибсхонасида сақланаётган аёлларнинг саломатлигини мустаҳкамлаш мақсадида уларни чуқурлаштирилган тиббий кўрикдан ўтказиш ташкил этилди.
Шу билан бирга, Термиз шаҳридаги вилоят тиббиёт кластерда диспансер ҳисобида турган беморларнинг оила аъзолари ҳамда тиббиёт ходимлари иштирокида ўқув машғулоти ўтказилди.
Унда мазкур тоифадаги беморлар томонидан жиноят ва ҳуқуқбузарликлар содир этилишининг олдини олиш, уларга дори-дармонларни ўз вақтида бериш, парваришлаш, шунингдек, уй шароитида беморлар билан тўғри мулоқот қилиш масалалари юзасидан батафсил тушунтиришлар берилди.
Шунингдек, беморларни белгиланган тартибда мажбурий даволашга юбориш бўйича тегишли чора-тадбирлар белгиланди. Беморларнинг яқин қариндошлари мурожаатлари, уларни даволаш учун ажратилган дори воситаларининг етарлилиги ҳам ўрганилди.
Ўрганишлар якуни бўйича аниқланган камчиликларни бартараф этиш, инсон ҳуқуқ ва қонуний манфаатларини таъминлаш ҳамда тиббий-профилактик ишларни янада самарали ташкил этиш юзасидан масъулларга тегишли кўрсатма ва топшириқлар берилди.
Республика идоралараро мувофиқлаштирувчи штаби ва ишчи гуруҳининг Сурхондарё вилоятидаги ўрганишлари давом этмоқда.
Сурхондаре вилояти ИИБ Ахборот хизмати