Қашқадарё вилояти ИИБ томонидан «қизил» тоифадаги маҳаллаларда хавфсиз муҳитни яратишга қаратилган комплекс чора-тадбирлар амалга оширилмоқда
2026-09-10 09:00:00 / Янгиликлар
Қашқадарё вилояти ички ишлар бошқармаси томонидан вилоятдаги 65 та «қизил» тоифадаги маҳаллаларда криминоген вазиятни барқарорлаштириш, жиноятларни барвақт олдини олишга қаратилган ҳамкорликдаги чора-тадбирлар «Йўл хариталари» ишлаб чиқилган.
Ушбу топшириқ ижроси доирасида Қарши шаҳридаги «қизил» тоифадаги «Чолқувар» маҳалласида жиноятчиликка қарши курашиш, ҳуқуқбузарликлар профилактикаси ва жамоат хавфсизлигини таъминлашга қаратилган «Иш режаси» ишлаб чиқилди.
Мазкур жараённи шахсан назорат қилиш мақсадида Қашқадарё вилояти ИИБ бошлиғи, полковник Абдувоҳид Исмоилов маҳаллага ташриф буюриб, маҳалла еттилиги, профилактика инспекторлари ва соҳа масъуллари билан учрашди.
Учрашувда ҳудуддаги криминоген вазият танқидий таҳлил қилиниб, масъулларга тегишли хизмат йўриқномалари ва топшириқлар берилди.
Мазкур режа асосида Қарши шаҳридаги «қизил» тоифадаги маҳаллаларга 120 нафар ходим жалб этилиб, ҳудудларда жиноятчиликнинг олдини олиш, ҳуқуқбузарликлар профилактикасини кучайтириш ҳамда жамоат хавфсизлигини таъминлаш бўйича комплекс ишлар ташкил этилди.
Таҳлилларга кўра, жорий йилнинг 8 ойи давомида Қарши шаҳрида 2 минг 56 та мурожаат қайд этилган.
Шу муносабат билан Чолқувар маҳалласида 8–18-сентябр кунлари жиноятчилик ва ҳуқуқбузарликларнинг олдини олишга қаратилган комплекс профилактик тадбирлар ўтказилмоқда.
Маҳалладаги 66 та кўп қаватли уй хатловдан ўтказилиб, хавф гуруҳига кирувчи шахслар ва оилалар алоҳида ўрганилмоқда.
Профилактика ишларига қўшимча кучлар жалб этилиб, уларнинг фаолияти мунтазам таҳлил қилиб борилиши белгиланди.
Шунингдек, аҳоли гавжум бўладиган ҳудудларда пиёда ва мото-патруллар ҳамда тезкор ҳаракатланувчи гуруҳлар хизмат олиб бориши йўлга қўйилади. Меҳмонхоналар, савдо дўконлари, кафе ва барлар ҳамда бошқа объектларда хавфсизлик ва қўриқлаш тизими қайта кўриб чиқилади.
Тунги вақтларда айланма йўлларда авто-рейд тадбирлари мунтазам ташкил этилиши, зарур объектларга «Ташвиш SOS» тугмалари ўрнатилиши бўйича масъулларга тегишли топшириқлар берилди.
Бундан ташқари, маҳаллада ўрнатилган 187 та видеокузатув камераси қайта хатловдан ўтказилиб, носозлари таъмирланади, зарур нуқталарга қўшимча камералар ўрнатилади.
Асосий мақсад — «қизил» тоифадаги ҳудудларда хавфсиз муҳитни яратиш, фуқаролар осойишталигини таъминлаш ва жиноятчиликнинг барвақт олдини олиш.
Қашқадарё вилояти ИИБ Ахборот хизмати