Ўзбекистон Республикаси Ички ишлар вазирлиги

Самиранинг ота-онаси ажрашиб кетишгач, опаси иккаласи онаси билан қолди. Рўзғор юки онаси Фазолатга тушганидан кейин фарзандларини боқиш, уларни кийинтириш учун маблағ топишга Россияга ишга кетди.

Самира онаси кетгач, тушкунликка тушиб қолди. Бувисининг қўлида онасиз сиқилди. Оиласи ўртоқлариникидай эмаслигидан эзилди. Вақтини хушнуд ўтказиш учун кўчада кўп юрадиган, баъзан уйга келмайдиган янги одатлар чиқара бошлагач, бувиси ички ишлар идораларига мурожаат қилди.

Самирани вилоят ИИБ ЖХХ ҲПБ Вояга етмаганларга ижтимоий-ҳуқуқий ёрдам бериш марказига олиб келишди. У билан профилактик суҳбатлар олиб борилди.

Айниқса, Марказдаги тикувчилик тўгараги унга маъқул тушди. Ўсмир қизга она тарбияси, меҳри кераклигини тушунган марказ ходимлари онаси Фазолат опани хориждан қайтиб келишга кўндирди.

Шундан сўнг, Самира яна оиласи, онасининг бағрига қайтди. Меҳрсиз, қаровсиз, чорасиз қолган бундай болалар ҳар доим ёрдамга муҳтож бўлади, — дейди марказ психологи капитан Моҳида Жўраева. — Биз имкон қадар уларга ёрдам беришга, руҳан қўллаб-қувватлашга ҳаракат қилаяпмиз.

Шукрки, бу саъй-ҳаракатларимиз бесамар кетаётгани йўқ. Чунки қанчадан-қанча болаларнинг тўғри йўлга солиб, яна оиласи бағрига қайтишига эришаяпмиз.

Биргина жорий йилнинг ўзида марказга назоратсиз ва қаровсиз қолган 174 нафар вояга етмаган келтирилган бўлса, уларнинг 2 нафари ихтисослашган мактабга, 2 нафари ўғил болалар учун мўлжалланган ёпиқ турдаги таълим муассасасига жойлаштирилди. Яна 15 нафари васийлик ва ҳомийлик асосида оилаларга берилди. 155 нафари эса оиласига қайтарилди.

Дарвоқе, марказда тарбияланувчилар учун пазандачилик, сартарошлик ва тикувчиликни ўргатувчи устахоналар ташкил этилган бўлиб, унда болалар ҳунар ҳам ўрганаётгани қувонарли.

- Ҳунар ўрганган боланинг меҳнатга иштиёқи уйғонади. Бўш вақтини фойдали ишга сарфлайди. Бу эса болаларнинг ўзига бўлган ишончни кучайтиради ва соғлом ҳаётга қайтишига ёрдам беради, -дейди Моҳида Жўраева.

Марказда тарбияланиб, оиласи бағрига қайтган болаларнинг барчаси кейинчалик ҳам бир йил давомида назоратда бўлади. Уларнинг хулқ-атвори, оиласидаги вазият доимий равишда мониторинг қилиб борилади.

Фарзанд азиз, тарбияси унданда азиз дейди халқимиз. Ҳар бир боланинг яхши тарбия олиши, илм ўрганиб, келажакда жамиятга нафи тегадиган инсон бўлиб етишиши учун барчамиз масъулмиз.

©️ «Postda» газетаси, Феруза Раҳмонқулова, Сурхондарё вилояти.