Учтепа туманидаги 229-мактабда “Биринчи қўнғироқ” тадбирлари кўтаринки руҳда бўлиб ўтди
2026-09-02 21:00:00 / Янгиликлар
Мамлакатимиздаги барча таълим муассасаларида бу йилги “Биринчи қўнғироқ” тадбирлари “Ягона Ватан, ягона халқ бўлиб, янги ҳаёт ва келажак яратамиз!” шиори остида тантанали тарзда бўлиб ўтди.
Жумладан, пойтахтимизнинг Учтепа туманидаги 229-мактабда ташкил этилган тадбирда давлатимиз мадҳияси янграгач, Президентимизнинг мактаб ўқувчилари ва устоз-мураббийларга йўллаган табриги ўқиб эшиттирилди.
Илк бор мактаб остонасига қадам қўяётган жажжи ўқувчиларни кутиб олиш маросими ҳис-ҳаяжонли кечди. Саҳнага 175 нафар болажоннинг кириб келиши, ота-оналарининг қувончи, байрам муносабати билан ижро қилинган жўшқин куй-қўшиқлар тадбирга ўзгача файз бағишлади.
Биринчи қўнғироқдан сўнг уларга “Президент совғалари” тақдим қилинди.
Шундан сўнг, барча таълим муассасаларида бўлгани каби 229-мактабда “Келажак соати” дарслари бўлиб ўтди.
“Келажак соати” дарсларида иштирок этган ИИВ Бирлашган таҳририяти бош муҳаррири, подполковник Хуршидбек Рўзиев, Учинчи Ренессанс пойдевори бўлган — Янги Ўзбекистон ёшларининг ҳаётидаги унутилмас кун билан қутлаб, бугун уларнинг сифатли таълим олиши, замонавий билим ва касб-ҳунар эгаллаши, ўз иқтидор ва интилишларини тўлақонли намоён этиши учун барча имкониятлар яратилганини алоҳида таъкидлади.
“Билимлар куни” да ИИВ Бирлашган таҳририяти томонидан 229-мактаб кутубхонаси учун 100 дан зиёд бадиий китоблар тўплами тақдим қилинди.