Сирдарё вилоятининг Оқолтин туманидаги жиноятчилик ҳолати таҳлил қилинди ва мавжуд муаммоларни ҳал қилиш бўйича аниқ вазифалар белгиланди
2026-09-01 13:10:00 / Янгиликлар
Сирдарё вилояти ички ишлар бошқармаси бошлиғи, полковник Сардор Мирзараимов Оқолтин туманида бўлиб, ҳудудда жиноятчилик ва ҳуқуқбузарликларнинг барвақт олдини олиш ҳамда криминоген вазият барқарорлигини таъминлаш борасида амалга оширилаётган ишлар ҳолатини ўрганди.
Дастлаб сариқ ва қизил тоифада турган «Шодлик», «Янги давр» ва «Кўркам диёр» маҳалла фуқаролар йиғинларига ташриф буюрилиб, профилактика инспекторларининг хизмат фаолияти ҳамда улар учун яратилган шароитлар, жумладан, хизмат уйларининг ҳолати кўздан кечирилди. Мавжуд шароитларни янада яхшилаш юзасидан масъулларга тегишли кўрсатмалар берилди.
Шунингдек, Оқолтин тумани ички ишлар бўлими ҳузуридаги Қўриқлаш бўлими фаолияти, ижтимоий соҳа объектлари ва хонадонларни техник қўриққа олиш ҳолати, шунингдек, туман ички ишлар бўлими ходимлари учун яратилган хизмат шароитлари ўрганилди.
Ҳудуддаги криминоген вазият ва жиноятчиликнинг олдини олиш борасида амалга оширилаётган ишлар юзасидан туман ички ишлар бўлими бошлиғининг тақдимоти тингланди.
Ўрганишлар якунида шахсий таркиб иштирокида йиғилиш ўтказилиб, жиноят ва ҳуқуқбузарликларга қарши курашиш, аҳоли тинчлиги ва осойишталигини таъминлаш ҳамда фуқароларнинг ҳуқуқ ва қонуний манфаатларини ҳимоя қилиш борасидаги ишлар танқидий-таҳлилий руҳда муҳокама қилинди.
Йиғилишда мавжуд муаммо ва камчиликларни бартараф этиш, профилактик тадбирларни кучайтириш ҳамда хизмат фаолияти самарадорлигини ошириш юзасидан масъул раҳбарларга аниқ вазифалар белгилаб берилди.
Сирдарё вилояти ИИБ Ахборот хизмати