Навоийда мустақиллик байрами муносабати билан фуқаролиги бўлмаган шахсларга Ўзбекистон Республикаси фуқароси мақоми берилди
2026-08-28 20:20:00 / Янгиликлар
Юртимизда йиллар давомида яшаб, меҳнат қилиб, мамлакатимиз тараққиётига ўз ҳиссасини қўшиб келаётган фуқаролиги бўлмаган шахсларнинг Ўзбекистон Республикаси фуқаролигига қабул қилиниши эзгу мақсадларнинг амалий ифодасидир. Муҳтарам Президентимизнинг тегишли фармони асосида Навоий вилояти ҳудудида доимий яшовчи 3 нафар фуқаролиги бўлмаган шахсларга Ўзбекистон Республикаси фуқаролиги берилди. Шу муносабат билан Навоий вилояти ҳокимлиги биносида тантанали маросим ташкил этилди. Вилоят ҳокими ҳамда вилоят ИИБ бошлиги томонидан ушбу фуқароларга идентификацион ID-карталари топширилди.
Машаққатли йиллар давомида ҳалол меҳнати орқали жамиятда ўз ўрнини топган мазкур фуқаролар орасида Анас Валиахметов ҳам бор.
“— Бугун жуда ҳам хурсандман. Негаки бугун 9 йиллик орзуйим ушалди.“ — дейди 61 ёшни қаршилаган Анас Валиахметов .“ —Президентимизнинг бизларни ўйлаб қабул қилган ушбу фармонлари ўзбек халқининг нақадар олийжаноб ва инсонпарвар эканлигининг яна бир исботи. Бунинг учун юртбошимизга ўз миннатдорчилигимни билдираман. Мустақиллигимизнинг 35 йиллик тўйи барчамизга муборак бўлсин! “
Ўзбекистон фуқаролигига эга бўлиши мамлакатимизда инсон ҳуқуқ ва манфаатларини таъминлаш, фуқаролиги бўлмаган шахсларнинг ҳуқуқий мақомини белгилаш борасида амалга оширилаётган изчил ислоҳотларнинг амалий натижаларидан бири ҳисобланади. Бу эса мамлакатимизда инсон қадрини улуғлаш ва ҳар бир инсоннинг қонуний манфаатларини таъминлаш борасидаги эзгу саъй-ҳаракатларнинг яна бир ёрқин ифодаси.
Навоий вилояти ИИБ ахборот хизмати