Ўзбекистон Республикаси Ички ишлар вазирлиги

Ўзбекистон Республикаси Ички ишлар вазирининг тегишли фармойишига асосан, Кибержиноятларга қарши курашиш департаменти раҳбарияти томонидан Самарқанд вилоятининг барча шаҳар ва туман ҳудудий бўлинмалари раҳбарлари ҳамда ходимлари учун касбий билим ва амалий кўникмаларни оширишга қаратилган ўқув семинарлари ўтказилди.

Семинарларда кибержиноятларни аниқлаш, уларнинг содир этилиш усулларини таҳлил қилиш ва фош этиш, электрон қурилмалар ва рақамли маълумотлар билан ишлаш, рақамли далилларни аниқлаш, йиғиш, сақлаш ҳамда процессуал расмийлаштириш масалаларига алоҳида эътибор қаратилди.

Шунингдек, интернетдаги фирибгарлик, банк карталари ва электрон тўлов тизимлари билан боғлиқ жиноятлар, ижтимоий тармоқлар ва мессенжерлар орқали содир этилаётган ҳуқуқбузарликларни аниқлаш ва уларга қарши самарали чоралар кўриш бўйича назарий ва амалий машғулотлар ташкил этилди.

Машғулотларда замонавий кибертаҳдидлар, жиноят содир этишнинг янги усуллари, рақамли изларни аниқлаш ва таҳлил қилиш ҳамда кибержиноятларни тергов қилишда илғор тажрибалардан фойдаланиш масалалари ёритилди.

Мазкур семинарлар ходимларнинг касбий салоҳиятини ошириш, кибержиноятчиликка қарши курашишда ягона ёндашувни шакллантириш, тажриба алмашиш ҳамда рақамли жиноятларни ўз вақтида аниқлаш ва фош этиш самарадорлигини юксалтиришга хизмат қилади.

ИИВ Кибержиноятларга қарши курашиш департаменти