«Ҳалоллик — ходим шаъни, хизмат интизоми — унинг кафолати» мавзусида Навоий вилояти ИИБ ходимлари иштирокида профилактик учрашув ўтказилди
2026-08-15 13:40:00 / Янгиликлар
«Комплаенс ва маънавий маданият ойлиги» доирасида Навоий вилояти ИИБ ходимлари иштирокида «Ҳалоллик — ходим шаъни, хизмат интизоми — унинг кафолати» мавзусида профилактик учрашув ўтказилди. Ички ишлар вазирлиги Шахсий хавфсизлик бош бошқармаси масъул ходимлари ҳамда вилоят Ички ишлар бошқармаси бошлиғи иштирок этган мазкур учрашувда асосий эътибор хизмат интизоми, қонунчиликка амал қилиш ҳамда ҳалоллик масалаларига қаратилди. Сўз олганлар кейинги вақтларда тизим ходимлари томонидан содир этилаётган салбий хатти-ҳаракатларга алоҳида тўхталиб ўтди. Жамоада соғлом маънавий-руҳий муҳитни сақлаш, ҳар бир ходимнинг хизмат обрўсига масъулият билан ёндашиши муҳимлиги таъкидланди.
Шунингдек, шахсий таркибга касбий одоб-ахлоқ меъёрларига қатъий риоя қилиш, ўз хатти-ҳаракатларини маънан бошқариш ҳамда хизмат йўриқномаси талабларини сўзсиз бажариш лозимлиги уқтирилди. Учрашув давомида ходимларнинг ижтимоий-моддий муаммолари ҳам ўрганилди. Уларни ҳар томонлама қўллаб-қувватлаш ва амалий кўмаклашиш юзасидан чора-тадбирлар белгиланиб, масъулларга тегишли топшириқлар берилди.
Навоий вилояти ИИБ ахборот хизмати