Бухоро вилоятида Мустақиллик байрамига тайёргарлик ва жамоат хавфсизлигини таъминлаш ҳолати туманлар кесимида ўрганилмоқда
2026-08-13 12:20:00 / Янгиликлар
Бухоро вилояти Ички ишлар бошқармаси бошлиғи раҳбарлигидаги ишчи гуруҳ томонидан Ўзбекистон Республикаси Мустақиллигининг 35 йиллик байрам тадбирларига тайёргарлик кўриш ҳамда жамоат хавфсизлигини таъминлаш ҳолати вилоятнинг барча ҳудудларида изчил ўрганилмоқда.
Ўрганишлар Шофиркон, Пешку, Ромитан, Олот, Қоракўл, Жондор, Когон тумани, Когон шаҳри ҳамда Қоровулбозор туманларида давом эттирилиб, байрам тадбирлари ўтказилиши режалаштирилган асосий майдонлар, маданият масканлари, очиқ майдонлар, хиёбонлар ва уларга туташ ҳудудларнинг ҳолати танқидий-таҳлилий кўздан кечирилди.
Жараён давомида ҳудудларда ободонлаштириш ва тозалаш ишларини жадаллаштириш, байрам тадбирларини юқори савияда ташкил этиш, жойларни байрамона безатиш, пешлавҳалар ўрнатиш, тунги ёритиш тизимларини талаб даражасига келтириш ҳамда мавжуд инфратузилмани тартибга солиш масалаларига алоҳида эътибор қаратилди.
Шунингдек, аҳоли гавжум бўладиган ҳудудларда жамоат тартибини сақлаш, фуқаролар хавфсизлигини таъминлаш, кутилмаган ҳолатларнинг олдини олиш ва йўл ҳаракати хавфсизлигини кучайтириш юзасидан маҳаллий мутасаддилар билан атрофлича муҳокамалар ўтказилди. Хавфсизликни таъминлаш жараёнларини тўлиқ рақамлаштириш, замонавий кузатув камераларини кўпайтириш, уларнинг узлуксиз ишлашини таъминлаш ҳамда ягона тизимга интеграция қилиш бўйича ҳам аниқ вазифалар белгиланди.
Ўрганишлар якунида аниқланган камчиликларни қисқа муддатларда бартараф этиш, байрам тадбирларини кўтаринки руҳда ва юқори савияда ўтказиш, фуқаролар осойишталиги ва хавфсизлигини тўлиқ таъминлаш юзасидан масъул раҳбарларга тегишли кўрсатма ва топшириқлар берилди. Белгиланган вазифалар ижроси учун аниқ муддатлар белгиланиб, амалга оширилаётган ишларни қатъий назоратга олиш таъкидланди.
Бухоро вилояти ИИБ Ахборот хизмати