Ички ишлар вазирлиги раҳбарияти Навоий вилоятида ИИБда хизмат сафарида бўлиб, ташриф доирасида “Хавфсиз ва соғлом юрт“ тезкор профилактик тадбири доирасида амалга оширилган ишлар билан танишди
2026-08-12 11:10:00 / Янгиликлар
Ички ишлар вазири ўринбосари, генерал-майор Мирзарахимов Баходир Юлдошевич хизмат сафари билан Навоий вилоятида бўлиб, вилоят ички ишлар бошқармасида жамоат хавфсизлигини таъминлаш, ҳуқуқбузарликларнинг олдини олиш ва аҳоли осойишталигини мустаҳкамлаш борасида амалга оширилаётган ишлар билан яқиндан танишди.
Ташриф давомида “Хавфсиз ва соғлом юрт” тезкор-профилактик тадбири доирасида вилоят ҳудудида олиб борилаётган кенг қамровли чора-тадбирлар атрофлича ўрганилди. Хусусан, жиноятчилик ва ҳуқуқбузарликларнинг барвақт олдини олиш, уларни содир этишга сабаб бўлаётган омилларни аниқлаш ва бартараф этиш, аҳоли ўртасида соғлом турмуш тарзини тарғиб қилишга қаратилган профилактик ишлар таҳлил қилинди.
Мазкур тадбир доирасида маҳаллаларда осойишталикни таъминлаш, жамоат жойларида хавфсизликни кучайтириш, фуқаролар билан манзилли профилактик мулоқотларни йўлга қўйиш, айниқса, ёшлар билан ишлаш самарадорлигини оширишга алоҳида эътибор қаратилмоқда.
Ташриф жараёнида ички ишлар органлари ходимларининг хизмат фаолияти ҳам кўздан кечирилиб, ҳудуддаги тезкор вазиятни барқарор сақлаш, ҳуқуқбузарликларнинг олдини олиш ва жамоат тартибини таъминлаш борасида амалга оширилаётган ишлар юзасидан масъул раҳбарларнинг ҳисоботлари тингланди.
Вазир ўринбосари томонидан профилактик тадбирларни сифатли ва манзилли ташкил этиш, ҳар бир ҳудудда юзага келиши мумкин бўлган хавфларни олдиндан аниқлаш, аҳоли билан яқин ҳамкорликни йўлга қўйиш ҳамда хизмат интизомига қатъий риоя этиш юзасидан тегишли кўрсатма ва тавсиялар берилди.
Айниқса, фуқароларнинг тинчлиги ва осойишталигини таъминлаш, жиноятчиликка қарши курашишда профилактика чораларининг самарадорлигини ошириш, ҳуқуқбузарликларнинг оқибати билан эмас, балки уни келтириб чиқарувчи сабаблар билан курашиш муҳим вазифа экани таъкидланди.
“Хавфсиз ва соғлом юрт” — бу, аввало, инсон қадри, унинг тинчлиги ва фаровон ҳаётини таъминлашга қаратилган эзгу мақсаддир. Шу боис Навоий вилоятида ушбу йўналишда амалга оширилаётган профилактик тадбирлар изчил давом эттирилиб, жамоат хавфсизлигини таъминлашнинг замонавий ва самарали усуллари кенг татбиқ этилмоқда.
Зеро, юрт тинчлиги — халқ фаровонлигининг, хавфсиз ва соғлом муҳит эса барқарор тараққиётнинг энг муҳим гаровидир.
Транспорт ва туризм объектларида хавфсизликни таъминлаш Департаменти Ахборот гуруҳи