Қўриқлаш соҳасида стратегик қадам: маҳаллий ишлаб чиқаришга асосланган йирик лойиҳага старт берилди
2026-08-08 14:05:00 / Янгиликлар
Бугун Тошкент шаҳридаги Қўриқлаш хизмати маъмурий биносида мамлакатимиз хавфсизлик инфратузилмасини янада такомиллаштириш, қўриқлаш соҳасини замонавий технологиялар билан таъминлаш ҳамда импорт ўрнини босувчи маҳаллий ишлаб чиқаришни йўлга қўйишга қаратилган муҳим тадбир бўлиб ўтди.
Унда Қўриқлаш департаменти бошлиғи полковник Қобил Шодибеков, Қашқадарё вилояти ҳокимининг инвестициялар, саноат ва савдо масалалари бўйича ўринбосари Шухрат Муратов ҳамда қўриқлашнинг техник воситаларини ишлаб чиқарувчи «S-SMART Security» корхонаси раҳбарияти иштирок этди.
Учрашув давомида қўриқлашнинг техник воситаларини Ўзбекистонда маҳаллийлаштириш, ишлаб чиқариш қувватларини кенгайтириш, инновацион технологияларни жорий этиш ҳамда соҳанинг техник мустақиллигини таъминлашга қаратилган йирик инвестиция лойиҳасини амалга ошириш бўйича икки томонлама меморандум имзоланди.
Мазкур меморандум мамлакатимизда қўриқлаш тизими учун зарур бўлган техник воситаларни маҳаллий ишлаб чиқариш, уларнинг рақобатбардошлигини ошириш, янги ишлаб чиқариш қувватларини ташкил этиш ва соҳага замонавий муҳандислик ечимларини кенг татбиқ этиш йўлидаги муҳим ҳуқуқий асос бўлиб хизмат қилади. Лойиҳа доирасида замонавий сигнализация тизимлари, интеллектуал хавфсизлик қурилмалари, назорат ва мониторинг ускуналари ҳамда бошқа техник воситаларни республика ҳудудида ишлаб чиқаришни босқичма-босқич йўлга қўйиш режалаштирилган.
Шунингдек Қўриқлаш ходимларининг фарзандларини информацион технологиялар йўналишида ўқитиш масаласи алоҳида эътибор берилди.
Учрашувда таъкидланганидек, мазкур ташаббус нафақат қўриқлаш соҳасининг техник салоҳиятини янги босқичга олиб чиқади, балки юқори қўшимча қийматга эга маҳсулотлар ишлаб чиқариш, янги иш ўринлари яратиш, маҳаллий саноат кооперациясини ривожлантириш ва инвестиция муҳитини янада мустаҳкамлашга ҳам хизмат қилади.
Томонлар меморандум доирасида ишлаб чиқариш инфратузилмасини шакллантириш, илғор технологияларни жорий этиш, юқори малакали мутахассисларни тайёрлаш ҳамда маҳсулотларни ички бозор билан бир қаторда ташқи бозорларга ҳам йўналтириш бўйича ўзаро ҳамкорликни изчил давом эттиришга келишиб олдилар.
Мазкур келишув Янги Ўзбекистонда юқори технологияли саноатни ривожлантириш, маҳаллийлаштириш даражасини ошириш ва хавфсизлик соҳасида миллий ишлаб чиқариш занжирини шакллантиришга қаратилган амалий ислоҳотларнинг навбатдаги муҳим босқичи сифатида эътироф этилмоқда. У мамлакатимизда қўриқлаш хизматининг техник имкониятларини кенгайтириш, соҳада рақамли ечимларни жорий этиш ҳамда хавфсизлик тизимининг барқарорлигини таъминлашга хизмат қилади.