Самарқанд вилоятида аҳоли мурожаатлари ўрганилиб, ички ишлар органларининг хизмат фаолияти ва инфратузилма объектлари кўздан кечирилди
2026-08-07 08:10:00 / Янгиликлар
Ички ишлар органлари фаолияти самарадорлигини ошириш, хизмат интизомини мустаҳкамлаш, аҳоли мурожаатлари билан ишлаш тизимини янада такомиллаштириш ҳамда мавжуд камчиликларни бартараф этиш мақсадида Ички ишлар вазири ўринбосари, полковник Диёрбек Саттаров бошчилигидаги ишчи гуруҳ томонидан Самарқанд вилояти ички ишлар органларининг хизмат фаолияти ўрганилди.
«Комплаенс ва маънавий маданият ойлиги» доирасидаги ўрганишларда Самарқанд шаҳрида аҳоли мурожаатларини манзилли кўриб чиқиш, уларнинг муаммоларига амалий ечим топиш мақсадида сайёр қабул ўтказилди.
Қабул давомида 30 дан ортиқ мурожаат кўриб чиқилди. Уларнинг аксарияти жойида ижобий ҳал этилди. 14 та мурожаат юзасидан фуқароларга ҳуқуқий тушунтириш берилди. Қўшимча ўрганиш талаб этувчи 8 та мурожаат ижрога олиниб, уларни қонуний ва ўз вақтида ҳал этиш бўйича масъулларга тегишли топшириқлар юклатилди. Шунингдек, сайёр қабул доирасида илк бор ИД-карта олаётган ёшларга тантанали равишда шахсини тасдиқловчи ҳужжатлар топширилди.
Ташриф давомида Самарқанд шаҳрида ўқув-амалий семинар ҳам ташкил этилди. Унда хизмат уйларини белгиланган ягона намуна ва талаблар асосида таъмирлаш, биноларнинг ташқи ҳамда ички қисмларини сифатли безатиш, ҳудудларни ободонлаштириш, шунингдек, қурилиш-таъмирлаш ишларини амалдаги меъёр ва стандартлар асосида ташкил этиш юзасидан зарур тавсия ва тушунтиришлар билдирилди.
Ишчи гуруҳ Тойлоқ тумани Ички ишлар бўлимида ходимлар учун яратилган шарт-шароитлар, маъмурий бинода амалга оширилган қурилиш-таъмирлаш ва ободонлаштириш ишлари билан танишди. Шу билан бирга, ҳудуддаги криминоген вазият ва жиноятчиликнинг олдини олишга қаратилган профилактик чора-тадбирлар таҳлил қилиниб, аҳоли билан манзилли ишлаш тизимини такомиллаштириш, профилактика инспекторлари фаолияти самарадорлигини ошириш, рақамли технологияларни кенг жорий этиш ҳамда хизмат интизомини янада мустаҳкамлаш бўйича устувор вазифалар белгиланди.
Пастдарғом туманида профилактика инспекторининг хизмат уйи, жамоат хавфсизлигини таъминлаш бўйича амалга оширилаётган ишлар ҳамда туман Ички ишлар бўлими маъмурий биносида яратилган шарт-шароитлар ўрганилди.
Ўрганишлар якунлари бўйича аниқланган камчиликларни бартараф этиш, хизмат самарадорлигини янада ошириш ҳамда фуқаролар мурожаатларини тезкор ва қонуний ҳал этишни таъминлаш юзасидан масъул раҳбарларга аниқ топшириқлар юклатилди.