Ўзбекистон Республикаси Ички ишлар вазирлиги

Давлатимиз раҳбарининг 2026-йил 5-январдаги ПҚ-1 ва ПҚ-2 сонли қарорлари ижросини таъминлаш ҳамда Ватанимиз мустақиллигининг 35 йиллигини муносиб кутиб олиш мақсадида Бухоро шаҳрида кенг кўламли ободонлаштириш ишлари жадал олиб борилмоқда. “Ягона Ватан, ягона халқ бўлиб, янги ҳаёт ва келажак яратамиз“ деган эзгу ғоя асосида энг улуғ, энг азиз байрамни маҳаллаларда кўтаринки руҳда ўтказиш учун юртимизда “Маҳаллада ободлик ва меҳр-саховат ойлиги“ эълон қилинди.

Мазкур ойлик доирасида шаҳар қиёфасини замонавийлаштириш, инфратузилмани янгилаш ҳамда аҳоли хотиржамлигини таъминлаш тадбирлари мутлақо янги босқичга кўтарилди. Хусусан, вилоят ИИБ бошлиғи марказий кўчалардаги бунёдкорлик, кўкаламзорлаштириш ва жамоат хавфсизлигини сақлаш борасидаги ишлар билан бевосита пиёда юрган ҳолда танишди. Ўрганишлар давомида қурилиш сифатини назорат қилиш, шаҳарсозлик нормаларига қатъий амал қилиш, савдо ва маъмурий объектлар атрофида тозаликни таъминлаш масалаларига алоҳида эътибор қаратилди.

Мулкий хавфсизликни кучайтириш мақсадида тадбиркорларга ўз ҳудудларида видеокузатув камераларини ўрнатиб, уларни марказлашган тизимга улаш ҳамда биноларни қўриқлаш хизматига топшириш юзасидан аниқ вазифалар берилди. Шунингдек, тунги ёритиш тизимларини хавфсизлик талабларига мос ва йўл ҳаракати иштирокчиларига халақит қилмайдиган тарзда ўрнатиш лозимлиги кўрсатиб ўтилди. Амалиётга жорий этилаётган бу чора-тадбирларнинг барчаси ҳудудларда “Хавфсиз кўча“ ҳамда “Хавфсиз йўлак“ тизимини тўлақонли рўёбга чиқаришга хизмат қилади.

Бу каби ободонлаштириш ва кўкаламзорлаштириш ишлари ҳар бир маҳаллада фаоллар иштирокида, “маҳалла еттилиги“нинг узвий ҳамкорлигида ташкил этилмоқда. Белгиланган барча вазифалар ижроси қатъий назоратга олинган бўлиб, бу ижобий ўзгаришлар кўҳна шаҳарнинг янада гўзаллашишига ҳамда аҳолининг тинч ва фаровон ҳаёт кечиришига мустаҳкам замин яратади.