300 та «локация»га синтетик гиёҳвандлик тарқатаётган «закладчик» Оҳангаронда қўлга олинди
2026-07-26 12:15:00 / Янгиликлар
Республика бўйлаб ўтказилаётган «Хавфсиз ва соғлом юрт» тезкор-профилактик тадбирлари доирасида Тошкент вилояти ИИББ ва унинг қуйи бўлинмалари ходимлари томонидан тадбирлар уюшқоқлик билан ташкил этилиб, қатор жиноятларнинг олди олинмоқда.
Хусусан, Оҳангарон туманида ўтказилган тезкор тадбирда, Навоий вилояти Конимех туманида яшовчи, 1996 йилда туғилган А.С. гиёҳвандлик ва психотроп моддаларни контактсиз – манзил усулида тарқатиш («закладчик») фаолияти билан шуғулланаётгани аниқланди.
У навбатдаги «заҳри қотил»ни туманнинг овлоқ ҳудудидаги ерга кавлаб кўмаётган вақтида, далилий ашё билан ушланди.
Ушбу шахснинг телефони кўздан кечирилганда, шу каби 300 га яқин тарқатиш мақсадида яширилган гиёҳвандлик воситаларининг жойлашган «локация»лари мавжудлиги аниқланди.
Ушбу манзиллар бўйича текширув олиб борилган вақтда, ҳар бири 1 граммдан бўлган «мефедрон» синтетик гиёҳвандлик воситалари борлиги аниқланиб, тезкор ходимлар томонидан расмийлаштириб олинди.
Тезкор тадбир натижасида юзлаб фуқароларни заҳарлаши мумкин бўлган синтетик гиёҳвандлик воситалари йўқ қилинди. Ҳолат юзасидан ушланган шахсга нисбатан Жиноят кодексининг 273–моддаси 6–қисми билан жиноят иши қўзғатилиб, тергов ҳаракатлари олиб борилмоқда.
Тошкент вилояти ИИББ Ахборот хизмати