“Хавфсиз ва соғлом юрт“ тезкор-профилактик тадбирлари доирасида Тошкент вилояти ИИББ ҳамда ДХХ тезкор ходимлари томонидан 4 нафар фуқаронинг одам савдоси қурбони бўлишининг олди олинди
2026-07-24 11:40:00 / Янгиликлар
Одам савдоси – трансмиллий, яъни ҳудуд ва чегара танламайдиган оғир жиноятдир. Афсуски бу иллатга қарши олиб борилаётган кескин курашларга қарамай, баъзи шахслар ўз манфаатларини устун қўйиб, ана шундай жирканч жиноятларга қўл урмоқда.
Республика миқёсида ўтказилаётган “Хавфсиз ва соғлом юрт” кенг кўламли тезкор-профилактик тадбирнинг 2-босқичи доирасида Тошкент вилояти Ички ишлар бош бошқармаси ва Давлат хавфсизлик хизмати тезкор ходимлари томонидан вилоятнинг турли ҳудудларида истиқомат қилувчи бир неча фуқароларимиз одам савдоси қурбонига айланишининг олди олинди.
Хусусан, Чирчиқ шаҳрида яшовчи 1991 йилда туғилган аёл, Туркия давлати, Истанбул шаҳрида яшовчи танишлари билан жиноий тил бириктириб, осон даромад орттириш мақсадида Тошкент вилояти Ўрта Чирчиқ туманида яшовчи 21 ёшли аёлни алдов йўли билан чет элга юборишга уринган.
Ушбу шахс, аёлни хорижда мўмай даромад топишга ишонтириб, Тошкент халқаро аэропорти орқали, Истанбулга фоҳишалик қилиш учун юбораётган вақтида Тезкор ходимлар томонидан далилий ашёлар билан ушлаб қолинди.
Маълум бўлишича жабрланувчини Истанбулда яшовчи бошқа Ўзбекистонлик аёл кутиб олиши керак бўлган. Ҳозирда мазкур ҳолат юзасидан ушланган шахсга нисбатан Ўзбекистон Республикаси Жиноят кодексининг 135-моддаси билан жиноят иши қўзғатилган, тергов ҳаракатлари олиб борилмоқда.
Навбатдаги тезкор тадбирда эса, Бўстонлиқ туманида яшовчи 24 ёшли аёл одам савдоси қурбони бўлишининг олди олинди. Самарқанд вилояти Катта Қўрғон туманида яшовчи 1999 йилда туғилган аёл Туркияда яшовчи танишлари билан жиноий тил бириктириб, туманда яшовчи 24 ёшли қизга, қандай иш эканини айтмай, алдов йўли билан уни чет элга юборишга уринган.
Аёл уни Тошкент халқаро аэропорти орқали Истанбул шаҳрига шаҳвоний экстрадиция, фоҳишалик учун юбораётган вақтида тадбир иштирокчилари томонидан далилий ашёлар билан ушланди.
Маълум бўлишича жабрланувчини Истанбулда яшовчи Туркиялик шериги кутиб олиши керак бўлган. Ҳозирда ушбу аёлга ҳам, Жиноят кодексининг 135-моддаси тегишли бандлари билан жиноят иши қўзғатилган.
Тезкор ходимлар томонидан айнан Бўстонлиқ туманида яна давом эттирилган назорат тадбирида шу каби яна бир ҳолат фош этилди. Андижон вилояти Асака шаҳрида яшовчи 1987 йилда туғилган шахс, хорижда яшовчи танишларининг таклифига кўра, ўзига таниш бўлган, 24 ёшли аёлни чет элга юборишга уринаётган эди. Тошкент халқаро аэропортида улар ҳам далилий ашёлар билан ушланди ва жиноят иши қўзғатилди.
Шу каби яна бир ҳолатда, Ангрен шаҳрида яшовчи 29 ёшли аёлнинг ҳам алданиб қолишига чек қўйилди.
Ачинарлиси, ушбу назорат тадбирида, 20 ёшли аёл, 30 ёшли танишини, осон даромад топишига ишонтириб, ёлғон ишни ваъда қилган. Аслида эса уни Туркиядаги таниши билан тил бириктириб, у ердаги тунги клубда ишлаш учун юбораётган вақтида Ички ишлар бош бошқармаси ва Давлат хавфсизлик хизмати ходимлари томонидан тўхтатиб қолинди.
Ўтказилган тадбирлар давомида 4 нафар фуқароларимизнинг алдов ва одам савдоси қурбони бўлишининг олди олинди.
Ушланган барча шахсларга нисбатан тегишли тартибда жиноят ишлари қўзғатилиб, ҳозирда уларнинг жиноятига алоқадор бўлган хориждаги шерикларининг ҳам шахсини аниқлаш ва терговга жалб қилиш чоралари кўрилмоқда.
Тошкент вилояти бўйлаб “Хавфсиз ва соғлом юрт” кенг кўламли тезкор-профилактика ойлиги доирасида кучайтирилган назорат-рейд тадбирлари изчил давом эттирилмоқда.
Тошкент вилояти ИИББ Ахборот хизмати