Интерпол орқали халқаро қидирувда бўлган уч нафар шахс Ўзбекистонга қайтарилди
2026-07-22 16:00:00 / Янгиликлар
Интерполнинг Ўзбекистон Республикасидаги Миллий марказий бюроси Туркия Республикаси ҳуқуқни муҳофаза қилувчи органлари ҳамда Ўзбекистоннинг Истанбул шаҳридаги Бош консулхонаси билан ҳамкорликда ўтказилган тезкор-қидирув тадбирлари натижасида халқаро қидирувда бўлган уч нафар шахсни Ўзбекистонга экстрадиция қилишга эришди.
Мазкур натижа Ўзбекистон ва Туркия ҳуқуқни муҳофаза қилувчи органлари ўртасида йўлга қўйилган самарали ҳамкорлик, жиноятчиликка қарши курашиш ҳамда қидирувдаги шахсларни аниқлаш ва ушлаш бўйича тезкор ахборот алмашинувининг амалий самарасидир.
Тезкор-қидирув тадбирлари давомида Туркиянинг Истанбул шаҳрида яшириниб юрган халқаро қидирувдаги уч нафар шахснинг турган жойи аниқланиб, улар қўлга олинди.
Жумладан, Самарқанд вилоятида туғилган 28 ёшли шахс жинсий зўравонлик билан боғлиқ оғир жиноятни содир этганликда айбланиб халқаро қидирувга берилган эди.
Шунингдек, Бухоро вилоятида туғилган 34 ёшли шахс фирибгарлик жиноятини содир этганликда айбланиб қидирувда бўлган.
Яна бир ҳолатда эса Тошкент шаҳрида туғилган 50 ёшли шахс йирик миқдордаги фирибгарлик жиноятини содир этганликда айбланиб халқаро қидирувга эълон қилинган эди.
Қўлга олинган шахслар белгиланган тартибда Ўзбекистонга олиб келиниб, тегишли ҳуқуқни муҳофаза қилувчи органларга топширилди.
Интерполнинг Ўзбекистон Республикасидаги Миллий марказий бюроси халқаро ҳамкорлик механизмларидан самарали фойдаланган ҳолда трансмиллий жиноятчиликка қарши курашиш, қидирувдаги шахсларни аниқлаш ва уларни жавобгарликка тортиш ишларини изчил давом эттирмоқда.
Интерполнинг Ўзбекистон Республикасидаги Миллий марказий бюроси