Ўзбекистон Республикаси Ички ишлар вазирлиги

Тажрибадан яхши маълумки, оғир оқибатли йўл-транспорт ҳодисаларининг аксарият қисми маст ҳолда автомашина бошқариш ёки тезликни ҳаддан ташқари ошириш натижасида содир этилади.

Бегуноҳ инсонларни майиб-мажруҳ қилаётган, кимнингдир умрига зомин бўлаётган бундай ҳодисаларнинг олдини олиш учун эса қўпол қоидабузарлик содир этган ҳайдовчиларга нисбатан жазо муқаррарлигини сўзсиз таъминлаш зарур.

Бевосита рақамларга мурожаат этадиган бўлсак, Фарғона вилоятида 2024 йилнинг 7 ойи давомида ҳайдовчилар ва пиёдалар иштирокида 222774 та қоидабузарлик содир этилган бўлса, шундан 1685 нафар ҳайдовчи транспорт воситасини маст ҳолда бошқарганлиги ғоят ачинарлидир.

Ана шундай ҳуқуқбузарлик содир этган ҳайдовчиларга нисбатан жазо муқаррарлигини таъминлаш, бошқаларни эса огоҳликка чақириш мақсадида вилоятнинг барча шаҳар-туманларида сайёр судлар ташкил этилмоқда.

Жумладан, Тошлоқ тумани «Пиёзчилик» маҳалласида кенг жамоатчилик иштирокида ўтказилган сайёр судда ҳам ҳайдовчиларнинг йўл ҳаракати қоидаларига амал қилмай, спиртли ичимлик таъсирида автомобиль бошқарган ҳолатлари бўйича тўпланган ҳужжатлар атрофлича кўриб чиқилди.

Ҳуқуқбузарларга тегишли жазо тайинлашдан аввал уларнинг қилмишлари мутасадди раҳбарлар, маҳалла фаоллари ҳамда кенг жамоатчилик иштирокида муҳокама қилинди.

Аксарият йўл-транспорт ҳодисалари мана шундай беписанд ҳайдовчилар томонидан содир этилаётганлиги таъкидланиб, бундан бошқалар хулоса чиқариши зарурлиги қайд этилди.

Шу куни спиртли ичимлик истеъмол қилган ҳолда автомобиль бошқарган 6 нафар ҳайдовчининг ҳаракатига қонуний баҳо берилиб, одил суд томонидан 15 сутка маъмурий қамоқ жазосига ҳукм қилинди.

Ана шундай сайёр суд Марғилон шаҳрида ҳам ўтказилди. Йўл-транспорт ҳодисаси содир қилган, шунингдек, маст ҳолатда транспорт воситасини бошқарган ҳайдовчиларнинг қилмишлари кенг жамоатчилик иштирокида кўриб чиқилиб, ҳар бир содир этилган ҳуқуқбузарлик бўйича қонуний жазолар тайинланди.

Қўқон шаҳрида эса 300 нафардан ортиқ ҳайдовчилар иштирокида ўтказилган сайёр судда бир йил давомида такрор ва такрор қоидабузарлик содир этаётган ёки маст ҳолда руль бошқарган 7 нафар ҳайдовчига нисбатан 10 суткадан 15 суткагача бўлган маъмурий қамоқ жазоси берилди.

Сайёр судларнинг ҳуқуқбузар ҳайдовчилар ва кенг жамоатчилик иштирокида ўтказилаётгани бежиз эмас, — дейди вилоят ИИБ ЖХХ ЙҲХБ Ахборот гуруҳи катта инспектори, капитан Элбек Қобилов. — Фуқаролар маст ҳолда автомашина бошқариш ана шундай ҳуқуқий оқибатларга олиб келишини тушуниб етишлари, жазога тортилаётган ҳай-довчиларнинг ҳолатидан хулоса чиқаришлари зарур.

©️ «Postda» газетаси, Абдувосит Сидиқов, Фарғона вилояти.