Ўзбекистон Республикаси Ички ишлар вазирлиги

Ҳисобот даврида департамент ва унинг ҳудудий бўлинмаларига жами 7 минг 820 та мурожаат келиб тушди. Уларнинг 2 031 таси ички ишлар органларига хизматга қайта тиклаш, 2 029 таси ходимларнинг хатти-ҳаракатлари юзасидан, 1 317 таси ходимлар ҳамда уларнинг оила аъзоларини ижтимоий ҳимоя қилиш, 902 таси хизмат жойини ўзгартириш ва интизомий жазо чораларини қайта кўриб чиқиш, 835 таси ички ишлар органларига ишга қабул қилиш ҳамда 706 таси хизматни ўташ билан боғлиқ бошқа масалаларга оид мурожаатларни ташкил этди.

Барча мурожаатлар амалдаги қонунчилик талаблари асосида ҳар томонлама ва холисона кўриб чиқилиб, фуқароларнинг ҳуқуқ ва қонуний манфаатларини таъминлашга алоҳида эътибор қаратилди.

Фуқаролар билан очиқ мулоқотни таъминлаш мақсадида вазир ўринбосари – Маънавий-маърифий ишлар ва кадрлар билан таъминлаш департаменти бошлиғи томонидан ҳудудларда 11 марта шахсий ва сайёр қабуллар ўтказилди. Уларда 693 нафар фуқаронинг мурожаати бевосита эшитилиб, аксарият масалалар жойида ҳал этилди ёки ижроси назоратга олинди.

Мурожаатларни ўрганиш натижаларига кўра, ички ишлар органларидан асоссиз равишда бўшатилган 86 нафар ходимнинг ҳуқуқлари тикланиб, улар хизматга қайта қабул қилинди. Бу тизимда қонунийлик ва адолат тамойилларини таъминлашга қаратилган ишлар самарадорлигини яна бир бор намоён этди.

Таҳлиллар мурожаатларнинг салмоқли қисми ходимларнинг ижтимоий ҳимояси билан боғлиқ масалаларга тўғри келишини кўрсатди. Шу муносабат билан ҳисобот даврида 21 минг 748 нафар ходим турли ижтимоий қўллаб-қувватлаш чоралари билан қамраб олинди.

Жумладан, 302 нафар ходим уй-жой билан таъминланди, 7 минг 635 нафар ходимга ижара харажатлари учун компенсация тўланди, 931 нафар ходимга имтиёзли ссуда ҳамда 237 нафар ходимга автокредит ажратилди. Мазкур чора-тадбирлар ходимларнинг ижтимоий барқарорлигини таъминлаш, уларнинг хизмат вазифаларини самарали бажариши учун муносиб шарт-шароитлар яратишга хизмат қилмоқда.

Шунингдек, тизимда ходимларнинг касбий салоҳиятини ошириш, хизмат интизомини мустаҳкамлаш, маънавий-ахлоқий фазилатларини юксалтириш ҳамда фуқаролар билан мулоқот маданиятини такомиллаштиришга қаратилган ишлар изчил давом эттирилмоқда. Бу борада хушмуомалалик, хизмат этикаси, инсон қадрини улуғлаш, ҳар бир мурожаатга масъулият билан ёндашиш ва халқ дардига дахлдорлик туйғусини кучайтиришга қаратилган маънавий-маърифий ҳамда амалий ўқув тадбирлари мунтазам ташкил этилмоқда.

Ички ишлар вазирлиги томонидан келгусида ҳам фуқаролар мурожаатларини тезкор, холис ва қонуний асосда кўриб чиқиш, ҳар бир масалани манзилли ҳал этиш, ходимларнинг ижтимоий ҳимоясини янада кучайтириш, уларнинг касбий билим ва кўникмалари ҳамда хизмат муомаласи маданиятини юксалтириш борасидаги ишлар изчил давом эттирилади.