Тошкент шаҳрида рақамли хавфсиз муҳитни яратиш ва аҳоли осойишталигини таъминлаш мақсадида амалий ишлар олиб борилмоқда
2026-07-20 10:20:00 / Янгиликлар
Давлатимиз раҳбарининг топшириғига кўра Тошкент шаҳрида рақамли хавфсиз муҳитни яратиш ва аҳоли осойишталигини илғор ва илмий асосларга ёндашган ҳолда ташкил этиш мақсадида Қўриқлаш департаменти раҳбари Қобил Шодибеков томонидан пойтахт туманларида амалий ишлар олиб борилмоқда.
Хусусан, Миробод туманида видеокузатув тизимларини кенгайтириш, ташвиш тугмаларини ўрнатиш, кўча ёритиш тармоқларини соз ҳолатга келтириш, қўшимча патруллик ҳамда тезкор ҳаракатланувчи гуруҳлар фаолиятини йўлга қўйиш ишлари амалга оширилмоқда. Шунингдек, жамоат тартибини сақлаш ва ҳуқуқбузарликларнинг олдини олиш мақсадида хавф таҳлили асосида белгиланган ҳудудларда хизмат кучлари самарали тақсимланмоқда.
Амалга оширилаётган чора-тадбирлар доирасида кўп қаватли уйлар, савдо ва хизмат кўрсатиш объектлари, таълим муассасалари ҳамда аҳоли гавжум жойларда хавфсизлик инфратузилмасини янада такомиллаштиришга алоҳида эътибор қаратилмоқда. Бу орқали ҳуқуқбузарликларни барвақт аниқлаш, тезкор чора кўриш ва фуқаролар учун хавфсиз муҳитни таъминлаш имкониятлари кенгайтирилмоқда.
Қўриқлаш департаменти томонидан пойтахт ҳудудларида бу каби амалий ишлар босқичма-босқич давом эттирилиб, замонавий хавфсизлик инфратузилмасини шакллантириш, жиноятчиликнинг олдини олиш ва аҳоли тинчлигини таъминлашга қаратилган чоралар изчил амалга оширилмоқда.