Бухоро вилояти ИИБ раҳбарияти томонидан «Хавфсиз ва соғлом юрт» комплекс тезкор-профилактик тадбирлари ойлиги доирасида видеоселектор йиғилиши ўтказилди
2026-07-19 10:00:00 / Янгиликлар
Бухоро вилояти Ички ишлар бошқармаси бошлиғи раҳбарлигида республика бўйлаб ўтказилаётган «Хавфсиз ва соғлом юрт» комплекс тезкор-профилактик тадбирлари ойлиги доирасида ҳудудларда амалга оширилаётган ишлар ҳамда Ички ишлар вазири томонидан жорий йилнинг 17 июль кунида белгиланган вазифалар ижросига бағишланган кенгайтирилган видеоселектор йиғилиши бўлиб ўтди.
Йиғилиш давомида жамоат хавфсизлигини таъминлаш, ҳуқуқбузарлик ва жиноятчиликнинг олдини олиш ҳамда профилактик фаолият самарадорлигини оширишга қаратилган чора-тадбирлар бандма-банд, чуқур таҳлил асосида муҳокама қилинди. Ҳар бир позиция бўйича амалга оширилаётган ишлар танқидий кўриб чиқилди.
Муҳокамаларнинг асосий қисмида ҳудудлардаги криминоген вазиятдан келиб чиқиб, жиноятчилик ҳолати бўйича маҳаллалар «қизил», «сариқ» ва «яшил» тоифаларга ажратилган ҳолда ўрганилди.
Айниқса, «қизил» ва «сариқ» тоифадаги маҳаллаларда тинч ва барқарор муҳитни мустаҳкамлаш, ҳуқуқбузарликларнинг сабаб ва омилларини барвақт бартараф этиш ҳамда профилактика ишларини манзилли ташкил этиш бўйича шаҳар-туман ИИБ раҳбарлари ҳамда маҳалла масъулларининг ҳисоботлари эшитилди.
Йиғилишда бозорлар ва аҳоли гавжум ҳудудларда жамоат тартибини сақлаш, ёнғин хавфсизлиги талабларига риоя этилиши ҳамда видеокузатув тизимларининг самарали ишлаши масалалари атрофлича кўриб чиқилди.
Шунингдек, фуқароларнинг ҳуқуқий маданиятини юксалтириш, хусусан, интернет тармоғи орқали содир этилаётган фирибгарликлар, банк карталари билан боғлиқ жиноятлар каби кибержиноятлардан аҳолини огоҳлантиришга қаратилган тушунтириш ишларининг мазмуни ва қамровига алоҳида эътибор қаратилди.
Қўриқлаш хизмати томонидан жорий этилаётган замонавий техник воситалар ва рақамли хавфсизлик ечимларидан фойдаланган ҳолда мулк дахлсизлигини таъминлаш чоралари муҳокама қилинди.
Йиғилиш давомида Бухоро вилояти ва унинг туристик ҳудудларида тунги вақтларда хизматни ташкил этиш ҳолати ҳам ўрганилди. Аҳоли ва туристлар учун 24/7 режимда фаолият юритувчи кўнгилочар масканлар, умумий овқатланиш объектлари ҳамда савдо шохобчалари жойлашган ҳудудларда хавфсизликни таъминлаш тартиби таҳлил этилди.
Шу билан бирга, вилоят ИИБ тасарруфидаги объектларда қурилиш-монтаж ишларининг ҳолати, ходимларнинг хизмат шароитларини яхшилаш ва соҳанинг моддий-техника базасини мустаҳкамлаш юзасидан масъуллар билан фикр алмашилди.
Мавжуд ҳолат танқидий таҳлил қилиниб, йўл қўйилган камчиликларни тезкор бартараф этиш, профилактик тадбирларнинг таъсирчанлигини ошириш ва масъулиятни кучайтириш юзасидан Бухоро вилояти ИИБ бошлиғи томонидан барча ҳудудий бўлим раҳбарларига тегишли кўрсатма ҳамда аниқ топшириқлар белгилаб берилди.
Бухоро вилояти ИИБ Ахборот хизмати