Ўзбекистон Республикаси Ички ишлар вазирлиги

Жорий йилнинг 13–17 июль кунлари Ўзбекистон Республикаси Ички ишлар вазирлиги делегацияси давлат хизматлари кўрсатиш соҳасидаги илғор тажрибани ўрганиш мақсадида Япония Давлатига хизмат сафари билан ташриф буюрди.

Ўзбекистон Республикаси ИИВ ҳузуридаги Миграция ва персоналлаштириш департаменти раҳбарияти ва ходимларидан иборат делегация ташриф давомида шахсни тасдиқловчи ҳужжатларни расмийлаштириш ва бериш бўйича давлат хизматларини ташкил этиш тизими билан танишди.

Делегацияга Ўзбекистон Республикаси ИИВ ҳузуридаги Миграция ва персоналлаштириш департаменти бошлиғининг биринчи ўринбосари, полковник У. Мирзакамбаров раҳбарлик қилди. Ташриф дастури доирасида делегация аъзолари My Number Card идентификация карталарини бериш маркази ҳамда Синдзюку паспорт марказига ташриф буюриб, мазкур муассасаларнинг ташкилий тузилмаси, фаолият юритиш механизмлари, шунингдек, давлат хизматларини кўрсатиш жараёнларини бошқаришнинг замонавий тизимлари билан танишдилар.

Япон томони делегацияни қуйидаги йўналишлардаги амалий тажриба билан батафсил таништирди:

1. Шахсни тасдиқловчи ҳужжатларни расмийлаштириш ва бериш бўйича давлат хизматларини ташкил этиш;

2. Давлат хизматларини электрон шаклда кўрсатиш, жумладан, ҳужжатларни масофадан туриб расмийлаштириш ҳамда махсус мобил иловалардан фойдаланиш тартиблари;

3. “My Number Card” идентификация карталарини тайёрлаш жараёнлари ва ҳимоя элементлари.

Мазкур хизмат сафари Ўзбекистон Республикаси ва Япония Давлати ўртасидаги икки томонлама ҳамкорликни янада ривожлантиришда муҳим босқич бўлди.

Ташриф давомида орттирилган тажриба ва ўрганилган замонавий амалиётлар Ўзбекистон Республикасида давлат хизматлари кўрсатиш тизимини янада такомиллаштириш, самарали бошқарув ечимларини жорий этиш ҳамда аҳолига кўрсатилаётган хизматлар сифатини янада оширишга хизмат қилади.

ИИВ ҳузуридаги Миграция ва персоналлаштириш департаменти Ахборот гуруҳи