Навоий вилояти ҳуқуқни муҳофаза қилувчи органлари фаолиятини мувофиқлаштирувчи Кенгашининг кенгайтирилган идоралараро йиғилиши бўлиб ўтди
2026-07-18 09:30:00 / Янгиликлар
Йиғилишда вилоят Прокуратураси, ИИБ, Миллий гвардия, МИБ, Департамент, Маҳаллалар уюшмаси, Камбағалликни қисқартириш ва бандлик бошқармаси, Ёшлар ишлари агентлиги, Мактабгача ва мактаб таълими, Соғлиқни сақлаш раҳбарлари ҳамда видеоконференция орқали туман (шаҳар) прокурорлари, ички ишлар бўлимлари бошлиқлари ва бошқа масъуллар иштирок этдилар.
Йиғилишда 2026 йил 6 ойи давомида жиноятчиликка қарши курашиш, ҳуқуқбузарликларни олдини олиш ва жамоат хавфсизлигини таъминлаш ҳамда ижтимоий – иқтисодий соҳалар кесимида мавжуд муаммолар ва йўл қўйилаётган камчиликлар танқидий муҳокама қилинди.
Шунингдек, фуқароларнинг ўзини ўзи бошқариш органлари билан ҳамкорликда профилактик тадбирларни мунтазам равишда ўтказиш, терговга қадар текширув, суриштирув ва тергов ҳаракатларини олиб боришда қонунийликни таъминлаш юзасидан зарур топшириқлар берилди.
Масъул раҳбарларнинг ҳисоботлари тингланиб, Кенгаш қарори билан ҳудудда криминоген вазият барқарорлигини таъминлашда ҳуқуқни муҳофаза қилувчи органлар ҳамда ҳокимлик, идора ва ташкилотларнинг ҳамкорлигини янада кучайтириш бўйича чора-тадбирлар белгиланиб, ижроси назоратга олинди.
Навоий вилояти ИИБ Ахборот хизмати