Соҳа фидойилари. Ўн беш йиллик сергаклик
2026-07-17 12:00:00 / Янгиликлар
Юрт тинчлиги ва эл осойишталигини таъминлаш йўлида кунни тунга улаб хизмат қилаётган инсонларнинг фидойилиги кўпинча кўзга ташланмайди. Аммо давлат аҳамиятига эга объектлар, банклар, суд ва прокуратура идоралари биноларининг хавфсизлиги айнан шундай ходимларнинг жонбозлиги эвазига таъминланади.
Сурхондарё вилояти ИИБ ҳузуридаги Қўриқлаш хизмати сафида 15 йилдан буён самарали фаолият юритаётган кичик сержант Сирожиддин Миркомилов бурчига садоқатли ходимлардан бири. У бугунги кунда «Ўзмиллийбанк» АЖ вилоят бош бошқармаси Термиз филиали хавфсизлигини таъминлашга муносиб ҳисса қўшиб келмоқда.
— Хизматимизда энг муҳим жиҳат — ҳушёрлик, — дейди кичик сержант Сирожиддин Миркомилов. — Бир лаҳзалик эътиборсизлик ҳам тузатиб бўлмас оқибатларга олиб келиши мумкин. Шунинг учун ҳар биримиз доимо сергак бўлишимиз шарт.
Унинг таъкидлашича, қўриқлаш хизмати нафақат жисмоний тайёргарлик, балки юксак муомала маданиятини ҳам талаб қилади.
Сирожиддин Миркомиловнинг хизмат фаолияти давомида юз берган воқеалар ҳам бу касбда ҳушёрлик ва тезкорлик қанчалик муҳим эканини яққол кўрсатади. Хусусан, 2015 йилнинг октябрь ойида тунги навбатчилик пайтида у банк биносига ўғринча киришга уринган икки нафар шахсни пайқаб қолади. Тезкор ҳаракатлар натижасида гумонланувчилар воқеа жойида қўлга олиниб, эҳтимолий ўғирлик жиноятининг олди олинади.
2017 йилда Термиз давлат университетида қабул жараёнлари кетаётган бир пайтда абитуриентлар ва уларнинг яқинлари тўпланган ҳудудда номаълум кимса бир қизнинг тилла тақинчоғини тортиб олиб, қочишга уринади. Сирожиддин зудлик билан ҳаракат қилиб, жиноятчини ушлашга муваффақ бўлади. Мана шундай шижоати ва сергаклиги учун у бир неча бор рағбатлантирилган.
— Агар инсон ўз касбини севса, ҳар қандай қийинчиликни енгиб ўтади, — дейди суҳбатдошимиз. — Муҳими, ўз олдингга аниқ мақсад қўйиб, жисмоний ва маънавий жиҳатдан ўз устингда ишлашдан тўхтамаслик керак.
Халқ осойишталиги ва мулк дахлсизлиги йўлида хизмат қилаётган қўриқлаш хизмати ходимларининг меҳнати ҳар қандай эътирофга лойиқ. Кичик сержант Сирожиддин Миркомилов каби ўз қасамёдига содиқ инсонлар бор экан, эл осойишта, юрт тинч бўлади.
Феруза Раҳмонқулова, ўз мухбиримиз. «Постда»
Сурхондарё вилояти