Ҳуқуқбузарликлар профилактикаси ва жамоат хавфсизлиги: Андижон ва Фарғона вилоятлари ИИБларида иккинчи ярим йиллик учун устувор вазифалар белгилаб олинди
2026-07-15 12:00:00 / Янгиликлар
Йиғилишларга ички ишлар вазирининг биринчи ўринбосари – Жамоат хавфсизлиги департаменти бошлиғи, генерал майор Рустам Джураев раислик қилди. Унда, ҳудудий ички ишлар органлари, ҳуқуқбузарликлар профилактикаси, жамоат тартибини сақлаш, йўл ҳаракати хавфсизлиги, пробация хизматлари ҳамда соҳавий хизматлар раҳбарлари иштирок этди.
Ҳисобот йиғилишлари танқидий-талабчан ва принципиал руҳда ўтказилиб, ҳар бир йўналиш кесимида эришилган натижалар ҳамда йўл қўйилган камчиликлар чуқур таҳлил қилинди. Масъул раҳбарларнинг ҳисоботлари тингланиб, хизмат фаолиятига қатъий баҳо берилди.
Хусусан, криминоген вазият, ҳуқуқбузарликлар профилактикаси самарадорлиги, жамоат тартибини таъминлаш, йўл ҳаракати хавфсизлиги, пробация хизмати фаолияти, хизмат интизоми ва қонунийликка риоя этиш ҳолати атрофлича муҳокама қилинди.
Ўтказилган таҳлиллар натижасига кўра, Андижон ва Фарғона вилоятларида жиноятларнинг олдини олиш ва ҳуқуқ-тартиботни мустаҳкамлашга қаратилган комплекс чора-тадбирлар амалга оширилаётгани қайд этилди. Шу билан бирга, айрим йўналишларда мавжуд камчиликлар кескин танқид қилиниб, уларни бартараф этиш юзасидан аниқ вазифалар белгилаб берилди.
Жумладан, Андижон вилоятида ҳуқуқбузарликлар профилактикаси ва жамоат хавфсизлигини таъминлаш соҳасида манзилли профилактика сифатини ошириш, профилактик ҳисобда турган шахслар билан ишлаш самарадорлигини кучайтириш, давлат ҳокимияти органлари ва жамоатчилик билан ҳамкорликни янада мустаҳкамлаш масалаларига алоҳида эътибор қаратилди.
Фарғона вилояти бщйича эса, қўшимча чоралар кўришни талаб этаётган устувор йўналишлар, яъни йўл-транспорт ҳодисаларининг олдини олиш, айниқса, вояга етмаган йўл ҳаракати иштирокчилари ўртасида профилактика ишларини кучайтириш, шунингдек, пробация хизмати томонидан индивидуал профилактика ишлари сифатини ошириш ва пробация назоратидаги шахслар устидан назорат самарадорлигини кучайтириш бўйича топшириқлар берилди.
Шунингдек, хизмат интизоми, қонунийликка қатъий риоя этиш ҳамда фуқаролар мурожаатларини кўриб чиқиш сифати масалаларига алоҳида эътибор қаратилди. Фаолиятида камчиликларга йўл қўйган айрим бўлинмалар ва масъул раҳбарлар ишига принципиал баҳо берилиб, камчиликларни қисқа муддатларда бартараф этиш юзасидан қатъий кўрсатмалар берилди.
Йиғилишлар якунида хизмат фаолиятида юқори натижаларга эришиб, ўзининг намунавий хизмати билан ажралиб турган бир гуруҳ ходимлар ташаккурномалар билан тақдирланди.
Йиғилишлар якунига кўра, 2026 йилнинг иккинчи ярим йиллиги учун аниқ устувор вазифалар белгилаб олинди. Ҳуқуқбузарликлар профилактикаси самарадорлигини ошириш, жамоат тартибини мустаҳкамлаш, йўл-транспорт ҳодисаларини камайтириш, профилактик ва пробация ҳисобида турган шахслар билан ишлашни такомиллаштириш бўйича тегишли топшириқлар берилди.
Белгиланган вазифалар ижроси Ички ишлар вазирлиги раҳбарияти томонидан алоҳида назоратга олинди.
ИИВ ЖХД Ахборот хизмати