Тошкент шаҳар ИИББ раҳбарияти томонидан Сергели ва Янгиҳаёт туманларида «Хавфсиз ва соғлом юрт» ойлиги доирасида амалга оширилаётган тадбирлар танқидий муҳокама қилинди
2026-07-15 10:00:00 / Янгиликлар
Пойтахтимизнинг Сергели ҳамда Янгиҳаёт туманлари ИИО ФМБларида фуқаролар хавфсизлигини таъминлаш, жамоат тартибини сақлаш ва ҳуқуқбузарликларнинг олдини олишга қаратилган ишлар юзасидан 2026 йилнинг биринчи ярим йиллиги якунлари, шунингдек, «Хавфсиз ва соғлом юрт» ойлиги доирасида амалга оширилаётган тадбирлар муҳокамасига бағишланган таҳлилий-танқидий руҳдаги йиғилишлар ўтказилди.
Тошкент шаҳар ИИББ раҳбарияти ҳамда шаҳар прокурори иштирокида бўлиб ўтган ушбу йиғилишларда туман раҳбарлари, маҳалла раислари ва бошқа масъуллар қатнашди.
Сергели туманида жамоат тартибини сақлаш, йўл-транспорт ҳодисаларининг олдини олиш ва объектларни қўриқловга олиш соҳасидаги камчиликлар, шунингдек, айрим турдаги жиноятлар (босқинчилик, фирибгарлик ва безорилик) сонининг ошгани кескин танқид қилинди.
Янгиҳаёт туманида эса ижтимоий профилактика тадбирлари ҳамда гиёҳвандлик билан боғлиқ жиноятларнинг олдини олиш ишлари талаб даражасида эмаслиги таъкидланди. Хусусан, ижтимоий профилактика тадбирлари манзилли ва самарали ташкил этилмагани оқибатида олдини олиш мумкин бўлган жиноятларга йўл қўйилгани қайд этилди.
Шунингдек, профилактика инспекторларининг маҳалла еттилиги ҳамда тегишли корхона ва ташкилотлар билан ҳамкорлиги суст бўлган маҳаллалар кўрсатиб ўтилди.
Йиғилишлар якунида туманлар ИИО ФМБлари фаолиятида йўл қўйилган камчиликлар таҳлил қилиниб, уларни бартараф этиш юзасидан ҳар бир соҳа раҳбарига криминоген вазиятни барқарорлаштириш бўйича аниқ топшириқлар берилди.
Жумладан, туманлар кесимида манзилли режалар ишлаб чиқиш, жиноятлар кўпайган маҳаллаларда профилактик ҳисобда турган ҳар бир шахс билан индивидуал ишларни ташкил этиш, патруль маршрутларини қайта кўриб чиқиш, «қизил» ҳудудларда хизматни кучайтириш ҳамда маҳалла еттилиги ва мутасадди ташкилотлар билан ҳамкорликни янада жадаллаштириш устувор вазифалар этиб белгиланди.
Тошкент шаҳар ИИББ Ахборот хизмати