Наманган вилояти ИИБ раҳбарияти томонидан профилактика инспекторлари ва саф бўлинмалари ходимлари учун навбатдаги ўқув машғулоти ўтказилди
2026-07-14 12:35:00 / Янгиликлар
Ички ишлар органлари ходимларини замонавий талаблар асосида профессионал кадр сифатида тайёрлаш, уларнинг хизмат ва жанговар шайлигини мустаҳкамлаш, назарий билим ҳамда амалий кўникмаларини юксалтириш мақсадида тизимли равишда ўқув ва спорт машғулотлари ташкил этиб келинмоқда.
Шу мақсадда Наманган вилояти ИИБ бошлиғи раҳбарлигида Жамоат тартибини сақлаш бошқармаси биносида навбатдаги ўқув машғулоти ўтказилди. Унда ИИВ ШХББ Наманган вилояти бўйича бошқармаси бошлиғи ва унинг ўринбосарлари, соҳавий хизматлар раҳбарлари, шаҳар ва туман ИИБ профилактика инспекторлари, патруль-пост ҳамда йўл-патруль хизмати ходимлари иштирок этди.
Машғулот давомида ходимларга хизмат фаолиятида қонунийлик ва хизмат интизомига қатъий риоя этиш, фуқаролар билан муомала маданияти, амалдаги қонунлар ҳамда қонуности норматив-ҳуқуқий ҳужжатлар талабларини тўлиқ ва бир хилда қўллаш юзасидан батафсил тушунтиришлар берилди.
Шунингдек, хизмат жараёнида расмийлаштириладиган процессуал ҳужжатларни қонунчилик талабларига мувофиқ юритиш, уларни расмийлаштиришда йўл қўйилиши мумкин бўлган камчиликларнинг олдини олиш, ҳуқуқни қўллаш амалиётида ягона ёндашувни таъминлаш масалалари юзасидан тавсия ва кўрсатмалар берилди.
Ўқув машғулотининг амалий қисмида махсус тайёрланган ўқув фильми намойиш этилиб, унда хизмат фаолиятида учраши мумкин бўлган турли вазиятларда ходимларнинг қонуний ва тўғри ҳаракат қилиш тартиби, процессуал ҳаракатларни амалга ошириш кетма-кетлиги ҳамда амалий тажрибалар атрофлича ёритилди.
Наманган вилояти ИИБ Ахборот хизмати