Тошкент шаҳар ИИББ раҳбарияти томонидан “Хавфсиз ва соғлом юрт” ойлиги доирасидаги ишлар туманлар кесимида таҳлил этилди
2026-07-11 10:00:00 / Янгиликлар
Юртимизда тинчлик-осойишталикни таъминлаш, жамоат тартибини сақлаш, ҳуқуқбузарликларнинг барвақт олдини олиш, хусусан, пойтахт аҳолиси ҳамда меҳмонлари учун тинч-осойишта ва хавфсиз шарт-шароитлар яратиш борасида Тошкент шаҳар ИИББ томонидан кенг кўламли ишлар амалга оширилмоқда.
“Хавфсиз ва соғлом юрт” комплекс махсус тезкор-профилактик тадбирининг иккинчи босқичи ўтказилаётгани бунинг яққол мисолидир. Тадбир доирасида шаҳримизнинг Миробод ва Яккасарой туманлари ИИО ФМБлари томонидан амалга оширилаётган ишлар ўрганилди.
Тошкент шаҳар ИИББ бошлиғи полковник Равшан Султанходжаев, шаҳар прокурори вазифасини бажарувчи Анвар Ўрмонов, шунингдек, туманлар раҳбарияти иштирокида ўтказилган кенгайтирилган йиғилишда Ўзбекистон Республикаси Президентининг ПҚ-1-сон қарори ижроси ҳам муҳокама қилинди.
Мазкур туманларда ҳуқуқбузарликлар ва жиноятларнинг олдини олишни кучайтириш, гиёҳвандлик воситаларининг ноқонуний муомаласи ҳамда кибержиноятчиликка қарши курашиш, йўл ҳаракати хавфсизлигини таъминлаш самарадорлигини ошириш, видеокузатув тизимларини кенгайтириш, «Хавфсиз шаҳар» комплексининг имкониятларини ривожлантириш, маҳалла еттилиги ва бошқа жамоат тузилмалари билан ўзаро мувофиқлаштирилган фаолиятни кучайтириш борасида амалга оширилаётган ишлар таҳлил қилинди.
Йиғилишда кун тартибидаги масалалар қаторида аҳоли саломатлиги ва миллат генофондига жиддий таҳдид солаётган гиёҳвандлик ҳамда уюшган наркожиноятчиликка қарши амалга оширилаётган ишларга алоҳида эътибор қаратилди.
Ойлик доирасида пойтахт туманларида ташкил этилган ишчи гуруҳлар томонидан туну кун хизмат олиб бориш йўлга қўйилган. Улар томонидан 207 та гиёҳвандлик ва кучли таъсир қилувчи моддалар билан боғлиқ ҳолат аниқланиб, 27 кг 740 гр гиёҳвандлик воситалари ҳамда 3 024 дона кучли таъсир қилувчи дори воситалари мусодара қилинган.
Бироқ олиб борилаётган ишларга қарамай, соҳавий хизматлар томонидан йўл қўйилган айрим жиддий камчиликлар ҳам қайд этилди.
Ҳар икки туман ИИО ФМБ раҳбариятига аниқланган камчиликларни бартараф этиш юзасидан тегишли кўрсатма ва топшириқлар берилди.
Тошкент шаҳар ИИББ Ахборот хизмати