ИИВ раҳбарияти томонидан Сурхондарё вилоятида “Хавфсиз ва соғлом юрт” тадбирлари доирасида амалга оширилган ишлар ўрганилди
2026-07-10 15:20:00 / Янгиликлар
Ўзбекистон Республикаси Ички ишлар вазирининг ўринбосари, полковник Рамазон Ашропов раҳбарлигидаги ишчи гуруҳ Сурхондарё вилоятида “Хавфсиз ва соғлом юрт” кенг қамровли тезкор-профилактик тадбирлари доирасида амалга оширилаётган ишлар билан танишди.
Сурхондарё вилояти Ички ишлар бошқармасида ўтказилган йиғилишда мазкур тадбир доирасида жамоат тартибини сақлаш, ҳуқуқбузарликлар ва жиноятларнинг олдини олиш, криминоген вазиятни барқарорлаштириш, фуқароларнинг ҳаёти, соғлиғи ва мол-мулки дахлсизлигини таъминлаш, профилактик чора-тадбирлар самарадорлигини ошириш ҳамда соҳавий хизматлар ўртасидаги ҳамкорликни янада мустаҳкамлаш масалалари муҳокама қилинди.
Шунингдек, ҳудудларда ҳуқуқбузарликларнинг барвақт олдини олиш, аҳоли билан манзилли ишлаш, профилактик тадбирларни сифатли ташкил этиш ва мавжуд куч ҳамда воситалардан самарали фойдаланиш бўйича устувор вазифалар белгилаб олинди.
Ташриф давомида Ички ишлар вазирининг ўринбосари Термиз шаҳар ички ишлар бошқармасида ташкил этилган “Хавфсиз ва соғлом юрт” тезкор штаби фаолияти билан ҳам танишди.
Ўрганишлар жараёнида штаб ишини ташкил этиш, жалб этилган бўлинмалар фаолиятини мувофиқлаштириш, давлат органлари билан ҳамкорликни йўлга қўйиш ҳамда амалга оширилаётган тадбирлар ижросини назорат қилиш масалаларига алоҳида эътибор қаратилди.
Йиғилиш якунида барча ҳудудий ва соҳавий хизматлар раҳбарларига белгиланган вазифаларни ўз вақтида, тўлиқ ва сифатли бажариш, хизмат интизоми ҳамда шахсий масъулиятни янада кучайтириш юзасидан аниқ кўрсатмалар берилди.
ИИВ ҳузуридаги Тергов департаменти