“Хавфсиз ва соғлом юрт” тезкор профилактика тадбирлари доирасида 389 та ҳолатда ўткир тиғли жисмларни олиб юриш фактлари аниқланиб, тегишли тартибда чора кўрилди
2026-07-10 07:55:00 / Янгиликлар
Тошкент вилоятида ўтказилаётган “Хавфсиз ва соғлом юрт” тезкор-профилактик тадбири доирасида ўтган 8 кун мобайнида вилоят ИИББ ва унинг қуйи тизимлари томонидан “Тиғ” махсус профилактик тадбирлари изчиллик билан ўтказилди.
Тадбир давомида кўча ва жамоат жойлари, шунингдек бошқа ҳудудларда ўткир тиғли ашёларни ноқонуний равишда олиб юрган 389 нафар шахс аниқланди. Улардан умумий ҳисобда 395 дона ўткир тиғли ашё (совуқ қурол) аниқланиб, белгиланган тартибда расмийлаштирилиб олинди.
Аниқланган ашёлардан 307 таси пичоқ, 66 таси кастет 8 таси бита бўлса, қолган 14 таси бошқа кўринишдаги тиғли жисмларни ташкил қилган. Ушбу тадбир натижасида ўзгаларга тан жароҳати етказиши мумкин бўлган қатор жиноят ёки ҳуқуқбузарликларнинг олди олинди.
Маълумот учун: Қонунга хилоф равишда совуқ қурол ёки совуқ қурол сифатида фойдаланилиши мумкин бўлган ашёларни олиб юриш базавий ҳисоблаш миқдорининг 1 дан 5 бараваригача бўлган миқдорда жарима солинишига сабаб бўлиши мумкин. Шунингдек, бошқа қонуний таъсир чоралари ҳам қўлланилиши белгиланган.
Тезкор профилактик тадбирлар Тошкент вилояти бўйлаб давом эттирилмоқда.
Тошкент вилояти ИИББ Ахборот хизмати