Қашқадарё вилояти Яккабоғ туманида «Хавфсиз ва соғлом юрт» тадбирлари доирасида жиноят муҳокамаси ўтказилди
2026-07-09 15:20:00 / Янгиликлар
Қашқадарё вилояти ИИБ бошлиғи, полковник Абдувоҳид Исмоилов ҳамда бир қатор масъуллар Яккабоғ туманида бўлиб, жиноятларнинг вужудга келиш сабабларини танқидий муҳокама қилди. Жараёнда туманнинг “Татар“ ва “Дархон“ маҳаллалари еттилиги, фаоллари, нуронийлар ҳамда кенг жамоатчилик вакиллари иштирок этди.
Муҳокама давомида спиртли ичимлик таъсирида содир этилган жиноят иши атрофлича кўриб чиқилди. Мазкур ҳолатнинг келиб чиқиш сабаблари, унинг ижтимоий оқибатлари ҳамда бундай салбий ҳолатларнинг олдини олиш юзасидан амалга оширилиши лозим бўлган чора-тадбирлар ҳақида фикр алмашилди.
Муҳокама якунида масъулларга ҳар бир маҳаллада ҳуқуқбузарликларнинг барвақт олдини олиш, фуқароларнинг мурожаатларини ўз вақтида ҳал этиш, жамоатчилик билан ҳамкорликни янада мустаҳкамлаш ҳамда “Хавфсиз ва соғлом юрт“ тезкор-профилактик тадбирлари доирасида белгиланган вазифалар ижросини таъминлаш бўйича аниқ топшириқлар берилди.
Қолаверса, давлатимиз раҳбарининг маҳаллаларда хавфсиз муҳит яратиш тамойили асосида амалга оширилаётган тарғибот тадбирларини янада кучайтириш лозимлиги таъкидланди. Айниқса, ижтимоий ходим ва профилактика инспектори томонидан ҳуқуқий ҳамда ижтимоий тарғибот-ташвиқот ишларини кўпайтириш, маҳалладаги бирор-бир низоли ҳолат ҳам назардан четда қолмаслиги лозимлиги тушунтирилди.
Қашқадарё вилояти ИИБ Ахборот хизмати