Наманган вилояти ИИБ бошлиғи раҳбарлигидаги ишчи гуруҳ томонидан «Хавфсиз ва соғлом юрт» тадбирларининг иккинчи босқичида амалга оширилаётган ишлар муҳокама қилинди
2026-07-09 15:20:00 / Янгиликлар
Наманган вилояти ҳудудида “қизил“ тоифадаги маҳаллаларда тизимли равишда ишларни ташкил этиш ва уларни босқичма-босқич “яшил“ тоифага олиб чиқиш, шунингдек, “Хавфсиз ва соғлом юрт“ кенг қамровли профилактик тадбирларининг иккинчи босқичида амалга оширилаётган ишлар бошқарма ишчи гуруҳи томонидан таҳлил қилиниб, аниқланган камчиликлар юзасидан амалий ёрдам кўрсатилмоқда.
Хусусан, бошқарма бошлиғи томонидан дастлаб Чортоқ тумани ИИБ ходимларининг фаолияти ҳамда “Хавфсиз ва соғлом юрт“ кенг қамровли профилактик тадбирларининг натижалари танқидий руҳда муҳокама қилиниб, профилактик тадбирларни жадаллаштириш юзасидан аниқ кўрсатмалар берилди.
Шунингдек, тумандаги “А.Навоий“, “Зафар Диёр“, “Дўстлик“, “Байналмилал“ ва “Баҳрикенглик“ маҳаллалари фаолияти билан танишилиб, маҳалла еттилиги, жумладан, профилактика инспекторининг фаолияти муҳокама қилинди ҳамда маҳаллаларда хавфсиз муҳитни яратиш, жиноятчиликка барҳам бериш, аҳоли муаммоларини ўрганиш ва бошқа соҳага доир масалалар бўйича топшириқлар берилди.
Ишчи гуруҳнинг бу каби ўрганишлари барча ҳудудларда тизимли равишда олиб борилмоқда.
Наманган вилояти ИИБ Ахборот хизмати