Ўзбекистон Республикаси Ички ишлар вазирлиги

Мамлакатимизда жамоат хавфсизлигини таъминлаш, ҳуқуқбузарликларнинг олдини олиш ҳамда аҳоли осойишталигини мустаҳкамлашга қаратилган «Хавфсиз ва соғлом юрт» кенг қамровли профилактик тадбирлари изчил амалга оширилмоқда.

Шу муносабат билан Ўзбекистон Республикаси Ички ишлар вазири ўринбосари, генерал-майор Мирзарахимов Баходир Юлдошевич раҳбарлигида Ички ишлар вазирлиги Транспорт ва туризм объектларида хавфсизликни таъминлаш департаменти масъул раҳбар ва ходимлари иштирокида хизмат йиғини ўтказилди.

Йиғилишда транспорт инфратузилмаси ва туризм объектларида жамоат тартибини таъминлаш, ҳуқуқбузарлик ва жиноятларнинг барвақт олдини олиш, фуқаролар ҳамда хорижий сайёҳлар хавфсизлигини таъминлаш борасида амалга оширилаётган ишлар таҳлил қилиниб, мавжуд камчиликлар юзасидан аниқ чора-тадбирлар белгилаб берилди.

Шунингдек, хизмат интизомини янада мустаҳкамлаш, профилактик ишлар самарадорлигини ошириш, замонавий ахборот технологиялари ва техник воситалардан самарали фойдаланиш, темир йўл вокзаллари, аэропортлар, метро бекатлари ҳамда туризм объектларида жамоат хавфсизлигини таъминлаш бўйича масъул ходимларга устувор вазифалар юклатилди.

Генерал-майор Мирзарахимов Баходир Юлдошевич томонидан ҳар бир раҳбар ва ходим ўз хизмат вазифасини юксак масъулият, садоқат ва фидойилик билан бажариши, аҳоли мурожаатларига ўз вақтида муносабат билдириши ҳамда ҳуқуқбузарликларнинг сабаб ва шарт-шароитларини бартараф этишга алоҳида эътибор қаратиши лозимлиги таъкидланди.

Йиғилиш якунида «Хавфсиз ва соғлом юрт» профилактик тадбирлари доирасида белгиланган вазифаларнинг ижросини сўзсиз таъминлаш, транспорт ва туризм объектларида хавфсизлик ҳамда жамоат тартибини янада мустаҳкамлаш бўйича масъулларга тегишли топшириқлар берилди.

ИИВ Транспорт ва туризм объектларида хавфсизликни таъминлаш Департаменти Ахборот гуруҳи