Сурхондарё вилояти ИИБ раҳбарияти томонидан чекка ҳудудларда жамоат хавфсизлиги ва йўл ҳаракати хавфсизлиги масалалари танқидий таҳлил қилинди
2026-06-24 10:00:00 / Янгиликлар
Жорий йилнинг 23 июнь куни Сурхондарё вилояти ИИБ бошлиғи ўринбосари – Жамоат хавфсизлиги хизмати бошлиғи полковник Жўрабек Авазов томонидан вилоятнинг чекка ҳудудлари ҳисобланган Узун, Сариосиё, Денов, Олтинсой ва Шўрчи туманларида хизмат фаолияти ўрганилди.
Ташрифлар давомида жиноятчиликнинг олдини олиш, жамоат хавфсизлигини таъминлаш, йўл ҳаракати хавфсизлигини мустаҳкамлаш ҳамда содир этилаётган йўл-транспорт ҳодисаларининг сабаб ва омилларини бартараф этиш масалалари атрофлича муҳокама қилинди.
Шунингдек, Ўзбекистон Республикаси Президентининг тегишли қарорлари ижросини таъминлаш бўйича амалга оширилаётган ишлар танқидий-таҳлилий руҳда кўриб чиқилиб, аниқланган камчиликларни бартараф этиш юзасидан масъул раҳбар ва ходимларга аниқ вазифа ҳамда топшириқлар берилди.
Йиғилишларда авария ўчоқларини аниқлаш, улар бўйича манзилли чора-тадбирлар ишлаб чиқиш, тунги хизмат самарадорлигини янада ошириш ҳамда профилактик тадбирларни кучайтиришга алоҳида эътибор қаратилди.
Таъкидланганидек, фуқароларнинг тинчлиги ва осойишталигини таъминлаш, жамоат тартибини сақлаш ҳамда ҳуқуқбузарликларнинг барвақт олдини олишга қаратилган тизимли ишлар изчил давом эттирилади.
Сурхондарё вилояти ИИБ Ахборот хизмати