Сурхондарё вилоятида волейбол спорт тури бўйича кичик ўсмирлар ва қизлар ўртасида ўтказиладиган “Президент Олимпиадаси” мусобақаларига тайёргарлик ишлари юқори савияда ташкил этилмоқда
2026-06-24 09:00:00 / Янгиликлар
Айни пайтда ўғил болалар Термиз шаҳрида, қиз болалар эса Бойсун туманида ўқув-йиғин машғулотларини олиб бормоқда. Машғулотлар доирасида қизлар жамоалари ўртасида ўртоқлик учрашувлари ташкил қилиниб, иштирокчиларнинг жисмоний тайёргарлиги, техник маҳорати ва жамоавий ҳаракатлари янада такомиллаштирилмоқда.
Ўқув-йиғин жараёнлари давомида спортчилар учун яратилган шарт-шароитлар ўрганилиб, аниқланган айрим камчиликлар тезкорлик билан бартараф этилди.
Хусусан, иштирокчиларнинг яшаш шароитларини яхшилаш ҳамда машғулотлар самарадорлигини ошириш мақсадида ётоқхона ва зарур спорт анжомлари билан таъминлаш ишлари амалга оширилди.
Ўзбекистон волейбол федерацияси Сурхондарё вилояти бўлими раиси ўринбосари Жўрабек Авазов машғулотларда иштирок этаётган ёш спортчилар билан учрашиб, уларнинг тайёргарлиги билан яқиндан танишиб, мусобақанинг республика босқичи — Президент Олимпиадасида муносиб иштирок этишларида омадлар тилади.
Таъкидлаш жоизки, бундай ўқув-йиғин машғулотлари ёш волейболчиларнинг тажрибасини бойитиш, рақобат муҳитини кучайтириш ва нуфузли мусобақаларда юқори натижаларга эришишда муҳим аҳамият касб этмоқда.
Сурхондарё вилояти жамоаси ҳам ҳудуд шарафини муносиб ҳимоя қилиш мақсадида пухта тайёргарлик кўрмоқда.
Сурхондарё вилояти ИИБ Ахборот хизмати