ИИВ Қоровул қўшинлари қўмондони бошчилигида ҳарбий қисм ва бўлинмаларда инспекторлик текшируви ўтказилди
2026-06-23 14:30:00 / Янгиликлар
2026 йилнинг 18-20 июнь кунлари Ўзбекистон Республикаси Ички ишлар вазирлиги Қоровул қўшинлари қўмондони полковник Хасан Батиров бошчилигида 7552 ҳарбий қисмда кенг қамровли инспекторлик текшируви ўтказилди. Ушбу тадбирдан кўзланган асосий мақсад — бўлинмаларнинг жанговар шайлиги, шахсий таркибнинг хизмат олиб бориш сифати ҳамда ҳарбий интизом ҳолатини ҳар томонлама баҳолашдан иборат бўлди. Текширув давомида ҳарбий хизматчиларнинг кундалик жанговар ва хизмат фаолиятларини ташкил этиш жараёнларига алоҳида эътибор қаратилди. Шахсий таркибнинг назарий ва амалий билим кўникмаларини мустаҳкамлаш, шунингдек, ҳуқуқий ва касбий тайёргарлик даражасини аниқлаш мақсадида қатъий савол-жавоб синовлари ўтказилди. Унда ҳар бир ҳарбий хизматчининг ўз хизмат вазифаларига ва низом талабларига қай даражада содиқлиги синовдан ўтди. Полковник Хасан Батиров текширув якунлари бўйича шахсий таркиб билан ўтказилган суҳбатда ҳарбий интизом ҳар қандай муваффақиятли жанговар хизмат фаолиятининг асоси эканлигини алоҳида таъкидлади. Ҳар бир ҳарбий хизматчининг юксак маънавий-руҳий ҳолати, ҳушёрлиги ва ватанга бўлган садоқати — хизмат олиб борилаётган стратегик аҳамиятга эга объектлар хавфсизлигининг бош гаровидир.
Текширув якунида аниқланган камчиликлар атрофлича муҳокама этилиб, келгусида жанговар хизмат самарадорлигини янада ошириш ва шахсий таркибнинг ҳушёрлигини сусайтирмаслик бўйича қўмондонлик томонидан тегишли топшириқ ва кўрсатмалар берилди.