Ўзбекистон Республикаси Ички ишлар вазирлиги

Аввал хабар берганимиздек, Минск шаҳрида Беларусь Республикаси, Россия Федерацияси ва Ўзбекистон Республикаси қўриқлаш хизматлари делегациялари иштирокида Қўриқлаш департаменти Техник кенгашининг иши давом этмоқда. Ушбу тадбир доирасида давра суҳбати ўтказилиб, унда ҳарбийлаштирилган қўриқлаш хизматини ташкил этиш тартиби, хизматлар қийматини шакллантиришнинг мавжуд ёндашувлари ҳамда жисмоний шахсларнинг қўриқловини таъминлаш имкониятлари ҳақида маълумотлар берилди.

Маърузалар доирасида иштирокчилар ўз мамлакатларидаги хизматлардан мисоллар келтириб, қўриқлаш фаолиятини ташкил этиш ва нарх белгилаш бўйича ёндашувларни таққосладилар, шунингдек, энг самарали ишлаш моделлари юзасидан фикр алмашдилар.

Шундан сўнг делегациялар «Миллий хавфсизлик. Беларусь – 2026» халқаро хавфсизлик саноати кўргазмасига ташриф буюрдилар. Беларусь ИИВ Қўриқлаш департаменти экспозицияси турли объектларни муҳофаза қилишга мўлжалланган энг замонавий қўриқлаш воситалари ва тизимларидан иборат бўлди. Асосий ишланмалар қаторида ахборот ресурсларини ягона хавфсизлик экотизимига интеграция қилиш, вазиятли таҳлил усуллари, трекинг тизимлари ва иссиқликни аниқлаш қурилмалари алоҳида қизиқиш уйғотди.

Шунингдек, ҳар бир иштирокчи ушлаш гуруҳи ходими, кинолог ёки қўриқланувчи шахс ролини ҳис қилиш имконини берувчи VR-майдон ҳам катта қизиқишга сабаб бўлди.

Журналистлар билан мулоқот чоғида Беларусь Республикаси ИИВ Қўриқлаш департаменти бошлиғи, милиция генерал-майори Александр Шепелев қуйидагиларни таъкидлади:

— Беларусь ИИВ Қўриқлаш департаменти кўплаб давлатлар, айниқса МДҲ мамлакатлари учун қўриқлаш соҳасини ривожлантириш, инновацияларни жорий этиш ва ишончли қўриқлаш хизматларини таъминлаш борасида етакчилардан бири ҳисобланади. Биз ҳамкасбларимизни тўпланган тажриба билан ўртоқлашиш мақсадида таклиф қилдик.

Мутахассисларимиз лойиҳаларни мустақил ишлаб чиқади ва жорий этади ҳамда тузилган шартномалар асосида мулкнинг сақланишини кафолатлайди.

Шундан кейин Росгвардиясининг Идорадан ташқари қўриқлаш бош бошқармаси ва Ўзбекистон Республикаси ИИВ ҳузуридаги Қўриқлаш департаменти делегациялари Минск вилоятидаги бўлинмалар фаолияти билан танишувни давом эттириб, Солигорск қўриқлаш бўлими ҳамда «Республика спелеодаволаш шифохонаси» давлат муассасасига ташриф буюрдилар.

Ташриф доирасида тезкор навбатчилик хизмати ва марказлаштирилган кузатув пульти фаолиятига алоҳида эътибор қаратилди. Айнан шу ерда сутканинг исталган вақтида нарядлар фаолияти мувофиқлаштирилиб, ҳудуддаги қўриқланадиган объектлар хавфсизлиги устидан назорат амалга оширилади.

Хорижий идоралар вакиллари туман даражасида қўриқлаш фаолиятини ташкил этиш, замонавий техник ечимлар ва қўриқлаш бўлинмаларининг имкониятлари билан амалий тарзда танишиш имконига эга бўлдилар.

Дастурнинг кейинги қисми Беларусь Республикасидаги энг ноёб тиббиёт муассасаларидан бири — Республика спелеодаволаш шифохонасига ташриф билан давом этди. Меҳмонлар 420 метр чуқурликда жойлашган ноёб ерости даволаш мажмуасига тушдилар. Бугунги кунда мазкур муассаса ерости калий конлари негизида ташкил этилган ва дори воситаларидан фойдаланмасдан даволаш усулини қўллайдиган дунёдаги ягона фаол муассаса ҳисобланади.

Шундан сўнг Россия Федерацияси ва Ўзбекистон Республикаси қўриқлаш хизматлари делегациялари Беларусь Республикасига ташриф доирасида Брест вилоятига йўл олдилар.

Меҳмонлар тезкор навбатчилик хизмати ва вилоят бошқармаси Мониторинг маркази фаолияти, шунингдек объектларни қўриқлашни ташкил этишда қўлланилаётган замонавий техник воситалар билан танишдилар.

Кейин хорижий идоралар вакиллари «Касбнинг энг яхши вакили» республика кўрик-танловига ташриф буюриб, иштирокчилар билан мулоқот қилди ҳамда амалиётчи мутахассислар томонидан фойдаланилаётган техник қўриқлаш воситалари билан танишди.

Брест вилоятида бўлиш давомида делегация Брест қалъасини ҳимоя қилишда ҳалок бўлганлар хотирасини ёд этиб, Мангу олов пойига гуллар қўйди ва «Уруш музейи — тинчлик ҳудуди» экспозициясини томоша қилди.

Шунингдек, меҳмонлар Беловеж ўрмонига ташриф буюриб, қадимий технологиялар музейида бўлдилар. У ерда меҳмонлар миллий нон билан кутиб олиниб, қизиқарли экскурсия ташкил этилди.