Ўзбекистон Республикаси Ички ишлар вазирлиги

Ёшликда олинган билим – тошга ўйилган нақш кабидир. Умрининг энг гуллаган даврини ҳуқуқни муҳофаза қилиш соҳасини ўрганишга бахш этган, ҳар томонлама ўзини чиниқтириб, халқ осойишталиги йўлида хизмат қилишга шайланаётган Ички ишлар вазирлиги Академияси битирувчилари учун бугун энг унутилмас кунлардан бири.

ЖАР спорт комплексида, ўзгача руҳиятда ташкил этилган Академия курсантларининг битирув тадбирида Ички ишлар вазири генерал-лейтенант Азиз Ташпулатов, соҳавий хизмат раҳбарлари, ҳукумат аъзолари, мамлакатимиз ҳуқуқни муҳофаза қилиш органлари масъуллари, фахрий генераллар, жамоатчилик фаоллари ҳамда битирувчиларни ота-оналари ва яқинлари иштирок этдилар.

Сўнгги йилларда Академияда йўлга қўйилган илғор ёндашувлар, яратилган улкан имкониятлар курсантларнинг сифатли таълим олиши, ўз салоҳияти ва иқтидорини рўёбга чиқариши, турли йўналишларда ютуқларни қўлга киритишида муҳим аҳамият касб этмоқда. Ички ишлар органларининг чинакам илмий марказига айланган Академияда кундузги таълим бакалавриатида ихтисослик йўналишлари кўпайтирилиб, кадрларни мақсадли тайёрлашга қаратилган мутлақо янги механизмлар татбиқ этилди.

Айниқса Давлатимиз раҳбарининг ташаббуси билан жорий этилган дуал таълим тизимининг самарали ташкил этилиши натижасида, курсантлар Академияда назарий билимларни эгаллаб, амалиётда тажрибали ходимлар мураббийлигида ғоят муҳим кўникмаларни ўзлаштириб келишмоқда.

Шу тариқа, тадбирнинг энг ҳаяжонли дақиқалари бошланди. Ички ишлар вазирлиги раҳбарияти, нуфузли меҳмонлар, ҳуқуқни муҳофаза қилиш органлари ва ҳарбий тузилма раҳбарлари томонидан курсантларга дипломлар тантанали тарзда топширилди. Ҳар бир ёш офицер қўлига дипломни олар экан, она Ватан олдидаги садоқатини яна бир бир изҳор этди.

Ёш офицерларга юзланган Ички ишлар вазири генерал-лейтенант Азиз Ташпулатов – Давлатимиз раҳбарининг ёшларга бўлган юксак ишончи, уларни ватанимизнинг чинакам олтин фонди сифатида шаклланишлари учун яратилаётган шароитлар бугун ўз самарасини бераётганини эътироф этди.

Жорий йилда Академияни тўққиз юз нафар курсантлар тамомлаган бўлса уларнинг қарийб юз нафарини қизлар ташкил этади. Эътиборлиси, ўттиз уч нафар курсантлар имтиёзли диплом билан тамомлаган бўлса, уларнинг икки нафарига муддатидан олдин катта лейтенант махсус унвонлари тақдим этилди.

Шунингдек, битирувчи ёшларимиздан 4 нафари ички ишлар вазири стипендияси, бир нафари “Жалолиддин Мангуберди” ва икки нафари “Чўлпон” стипендияларига, 10 нафари “Академия аълочиси” кўкрак нишонига сазовор бўлгани, 127 нафари эса миллий ва халқаро танловларда юқори ўринларни қўлга киритгани айниқса уларнинг келажагидан катта умидлар кутаётган ота-оналарнинг кўнглида чексиз фахр туйғуларини уйғотади.

Бундан ташқари, курсантлар Жаҳон, Осиё ва республика миқёсидаги нуфузли спорт мусобақалари ҳамда турдош олий таълим муассасалари ўртасида ўтказилган беллашувларда 30 та медални қўлга киритганлари устозлари ва мураббийларининг меҳнатлари қадрини янада намоён этмоқда.

Сўзга чиққан ҳукумат аъзолари ва курсантларнинг ота-оналари томонидан ёш офицерлар ва Ватан посбонларига бўлажак хизмат фаолияти давомида ҳар бир қарорни қонун устуворлигига таяниб, адолатни бош мезон қилиб, “инсон қадри”ни энг олий қадрият сифатида қабул қилиш, касбий фаолияти давомида ўз устида ишлашни ҳеч қачон тўхтатмасликни ва доим Ватан олдидаги қасамёдларига содиқ қолишларини насиҳат қилдилар.

Тантанали марш билан бутун майдонни айланиб чиққан шахсий таркиб охирги бор сафга тизилди. Академиядаги сўнгги кун, олдинда эса ёш лейтенантларни улкан масъулиятли вазифалар, ватан тинчлигини, халқ осойишталигини муҳофаза қилишдек шарафли хизмат кутмоқда.

Ишонамизки, бу салоҳиятли ёшлар, бугун уларга ота-оналари, устозлари, энг муҳими Давлат раҳбари томонидан билдирилган улкан ишончни албатта оқлайдилар.