Ўзбекистон Республикаси Ички ишлар вазирлиги

Бишкек шаҳрида Мустақил Давлатлар Ҳамдўстлиги (МДҲ)га аъзо давлатлар ички ишлар органларининг пойтахт шаҳарлардаги бўлинмалари раҳбарларининг VI Кенгаши бўлиб ўтди.

Мазкур халқаро тадбир МДҲ мамлакатлари пойтахтларидаги ҳуқуқни муҳофаза қилувчи органлар раҳбарларини бир майдонга жамлаб, жамоат хавфсизлигини таъминлаш, ёшлар ўртасида жиноятчиликнинг олдини олиш ҳамда идоралараро ҳамкорликни ривожлантиришнинг долзарб масалаларини муҳокама қилиш имконини берди.

Кенгашни Бишкек шаҳри Ички ишлар бош бошқармаси бошлиғи, милиция полковниги Азамат Токтоналиев очиб берди. У ўзининг қутлов нутқида Қирғизистон томони учун бундай нуфузли халқаро форумга мезбонлик қилиш катта шараф эканини таъкидлади.

— Бугунги учрашув касбий ҳамкорликни мустаҳкамлаш, илғор тажриба алмашиш ҳамда вояга етмаганлар ва ёшларнинг гиёҳвандлик воситалари тарқатиш, фирибгарлик схемалари ва ўғрилик каби умумжиноят йўналишидаги жиноятларга жалб этилишининг олдини олиш бўйича қўшма ечимларни ишлаб чиқиш учун муҳим халқаро майдон ҳисобланади. Ишончим комилки, ҳамкорликдаги фаолиятимиз натижалари халқаро ҳуқуқни муҳофаза қилувчи органлар ўртасидаги ҳамкорликни янада мустаҳкамлашга хизмат қилади, — деди Азамат Токтоналиев.

Кенгаш иштирокчилари амалий фаолият тажрибалари билан ўртоқлашиб, ёшлар жиноятчилигининг олдини олишга қаратилган самарали механизмларни тақдим этдилар, замонавий таҳдид ва хавф-хатарларни муҳокама қилдилар ҳамда МДҲга аъзо давлатлар ҳуқуқни муҳофаза қилувчи органлари ўртасидаги ҳамкорликни янада такомиллаштириш юзасидан таклифлар ишлаб чиқдилар.

Тадбир якунида МДҲга аъзо давлатлар ички ишлар органларининг пойтахт шаҳарлардаги бўлинмалари раҳбарлари VI Кенгаши Баённомасини имзолаш маросими бўлиб ўтди. Ҳужжатда эришилган келишувлар мустаҳкамланиб, келгусидаги ҳамкорликнинг устувор йўналишлари белгилаб олинди.

Шунингдек, Қирғиз Республикаси Ички ишлар вазири, милиция генерал-полковниги Улан Ниязбековнинг буйруғига асосан халқаро ҳамкорликни ривожлантириш ва Ҳамдўстлик давлатлари ҳуқуқни муҳофаза қилувчи органлари ўртасидаги ўзаро ҳамкорликни мустаҳкамлашга қўшган муносиб ҳиссаси учун кенгаш иштирокчиларига “Ҳисса учун” идоравий медали ҳамда эсдалик совғалари топширилди.

Кенгаш ишида МДҲга аъзо давлатлар ҳудудида уюшган жиноятчилик ва бошқа хавфли жиноятларга қарши курашни мувофиқлаштириш бюроси директори, полиция генерал-лейтенанти Олег Коновалов, Бюро директорининг биринчи ўринбосари, милиция полковниги Асқат Саматбекович Алиев, МДҲ Ижроия қўмитаси ҳузуридаги МДҲ давлатлари ички ишлар вазирлари кенгашининг вакили, милиция генерал-майори Александр Василев, шунингдек Озарбайжон, Арманистон, Беларус, Қозоғистон, Россия, Тожикистон, Туркманистон ва Ўзбекистон пойтахтларидаги ички ишлар органлари бўлинмалари раҳбарлари иштирок этдилар.

Йиғилиш давомида кун тартибидаги учта асосий масала кўриб чиқилди:

• вояга етмаганлар ва ёшларнинг гиёҳвандлик воситалари тарқатиш ҳамда фирибгарлик схемаларида иштирок этиш каби умумжиноят йўналишидаги жиноятларга жалб қилинишининг олдини олиш чоралари;

• ёшларнинг экстремистик ва радикал гуруҳларга ноқонуний ҳаракатларни содир этиш ҳамда ижтимоий-сиёсий вазиятни беқарорлаштириш мақсадида жалб этилишига қарши курашиш масалалари;

• ахборот-коммуникация технологиялари ва сунъий интеллект имкониятларидан фойдаланиш орқали ёшлар орасида радикал, жамиятга зид дунёқараш ҳамда жиноий турмуш тарзини тарғиб қилишнинг олдини олиш чоралари.