Интерполнинг Ўзбекистондаги Миллий марказий бюроси томонидан товламачилик учун қидирувда бўлган шахс Мисрдан экстрадиция қилинди
2026-06-19 12:40:00 / Янгиликлар
Ўзбекистон Республикаси Интерпол Миллий марказий бюроси ҳамда Миср Араб Республикаси Интерпол Миллий марказий бюросининг келишилган саъй-ҳаракатлари натижасида товламачилик жиноятини содир этганликда айбланиб, халқаро қидирувга берилган фуқаро Ўзбекистон Республикасига экстрадиция қилинди.
Қидирувдаги шахс Миср ҳудудида аниқланиб, қўлга олинди. Ваколатли органлар томонидан тегишли материаллар кўриб чиқилиб, зарур экстрадиция чоралари якунлангач, уни Ўзбекистон томонига топшириш тўғрисида қарор қабул қилинди.
Қоҳира ва Тошкент ўртасида тўғридан-тўғри авиақатнов мавжуд эмаслиги сабабли, уни олиб келиш йўналиши Россия Федерацияси орқали транзит тарзида ташкил этилди. Домодедово халқаро аэропорти орқали тўсиқсиз транзитни таъминлашда Россия Федерацияси Интерпол Миллий марказий бюроси муҳим ёрдам кўрсатди.
Экстрадиция қилинган шахс Ўзбекистон Республикасига олиб келингач, мамлакат қонунчилигига мувофиқ жиноий жавобгарликка тортиш учун ваколатли ҳуқуқни муҳофаза қилувчи органларга топширилди.
Ўтказилган тадбирлар Интерпол йўналиши бўйича халқаро полиция ҳамкорлигининг юксак самарадорлигини ҳамда ҳуқуқни муҳофаза қилувчи органларнинг содир этилган жиноятлар учун жавобгарликнинг муқаррарлиги тамойилига содиқлигини яна бир бор тасдиқлади.
Интерполнинг Ўзбекистондаги Миллий марказий бюроси