Хоразм вилояти ИИБда Ҳуқуқни муҳофаза қилиш академияси талабаларининг малакавий амалиёти самарали ташкил этилмоқда
2026-06-19 12:35:00 / Янгиликлар
Ўзбекистон Республикаси Ҳуқуқни муҳофаза қилиш академияси талабаларининг назарий билимларини амалиёт билан уйғунлаштириш, уларнинг касбий кўникмаларини шакллантириш ҳамда келгусида малакали ҳуқуқни муҳофаза қилувчи кадрлар сифатида етишиб чиқишларини таъминлаш мақсадида Хоразм вилояти Ички ишлар бошқармасида малакавий амалиёт жараёнлари юқори савияда ташкил этилмоқда.
Белгиланган режага мувофиқ, Академия кундузги таълим шаклининг 1-курс талабалари 21 майдан 20 июнга қадар, 2-курс талабалари эса 10 июндан 10 июлга қадар Хоразм вилояти ИИБнинг тегишли соҳавий хизматлари ва ҳудудий ички ишлар органларида малакавий амалиёт ўтамоқдалар.
Амалиёт давомида талабалар ички ишлар органлари фаолиятининг асосий йўналишлари билан яқиндан танишиб, ўзлари эгаллаган назарий билимларни амалий машғулотлар орқали мустаҳкамлаш имкониятига эга бўлмоқдалар. Айниқса, уларнинг тергов ҳамда эксперт-криминалистика соҳалари бўйича билим ва кўникмаларини оширишга алоҳида эътибор қаратилган.
Тажрибали терговчилар ва эксперт-криминалистлар раҳбарлигида талабаларга жиноят содир этилган ҳодиса жойини кўздан кечириш тартиби, далилларни аниқлаш, қайд этиш ва процессуал тартибда расмийлаштириш, криминалистик техника ва махсус воситалардан самарали фойдаланиш усуллари амалий тарзда ўргатилмоқда.
Шунингдек, улар жиноят ишларини тергов қилишнинг асосий босқичлари, дастлабки тергов ҳаракатларини ташкил этиш, процессуал ҳужжатларни расмийлаштириш, далилларни баҳолаш ҳамда қонунчилик талаблари асосида қарор қабул қилиш жараёнлари билан танишмоқдалар. Амалий машғулотларда талабалар воқеалар ривожини таҳлил қилиш, тезкор вазиятни баҳолаш, ҳуқуқий ечимларни ишлаб чиқиш ва касбий фикрлаш қобилиятини шакллантириш бўйича ҳам муҳим тажриба орттирмоқдалар.
Эксперт-криминалистика бўлинмаларида ташкил этилган машғулотлар давомида бармоқ излари, изшунослик, биологик ва бошқа моддий далилларни йиғиш, сақлаш ва экспертизага тайёрлаш жараёнлари юзасидан амалий кўникмалар шакллантирилмоқда. Талабалар криминалистик лабораториялар фаолияти билан танишиб, замонавий техник воситалардан фойдаланиш тартибини ўрганмоқдалар.
Бундан ташқари, амалиёт жараёнида талабалар хизмат интизоми, касб этикаси, фуқаролар билан мулоқот маданияти, инсон ҳуқуқ ва эркинликларини таъминлаш ҳамда қонун устуворлиги тамойилларига қатъий риоя қилиш масалалари бўйича ҳам тажрибали ходимларнинг тавсия ва маслаҳатларини олмоқдалар.
Хоразм вилояти Ички ишлар бошқармасида ташкил этилган мазкур малакавий амалиёт машғулотлари талабаларнинг келгусида ички ишлар органларида юксак масъулият, пухта билим ва амалий тажрибага эга мутахассис сифатида фаолият юритишлари учун мустаҳкам замин яратиб, уларнинг касбий салоҳиятини янада юксалтиришга хизмат қилмоқда.
Хоразм вилояти ИИБ Ахборот хизмати