Ўзбекистон Республикаси Ички ишлар вазирлиги

Республикамиз бўйлаб гиёҳвандлик воситаларининг ноқонуний айланмасига қарши курашиш, уларнинг етиштирилиши ва тарқатилишининг олдини олишга қаратилган тезкор-профилактик тадбирлар изчил давом эттирилмоқда.

Бу борада анъанавий тарзда ўтказиб келинаётган «Қорадори» кенг қамровли назорат-рейд тадбирлари юқори самара бермоқда.

Яқинда Тошкент вилояти Пискент туманида ўтказилган тезкор тадбирда хонадон шароитида тақиқланган гиёҳвандлик ўсимликларини парваришлаб келаётган шахснинг жиноий фаолиятига чек қўйилди.

«Бирлик» маҳалла фуқаролар йиғини ҳудудида жойлашган хонадонлардан бирида ўрнатилган тартибда кўздан кечириш ишлари олиб борилди.

Тезкор тадбир давомида хонадон соҳиби орқа ҳовлисидаги шийпон ва узумзорида инсон соғлиғи ва ҳаёти учун хавфли бўлган гиёҳвандлик ўсимликларини етиштириб келаётгани аниқланди.

Фуқаро ушбу яшил майдонда 57 туп тақиқланган ўсимликка алоҳида агротехник ишлов бериб, парваришлаган экан.

Мазкур ҳолат холислар иштирокида, белгиланган процессуал тартиб-қоидаларга мувофиқ ҳужжатлаштирилди, ўсимликлар ашёвий далил сифатида олинди.

Мусодара қилинган ўсимлик намуналарининг тури ва уларнинг таркибида тақиқланган моддалар бор-йўқлигини расман тасдиқлаш мақсадида судга оид кимёвий экспертиза тайинланди.

Экспертиза хулосаси эса, хонадондан олинган 57 туп ўсимлик кўкнори эканлигини кўрсатди.

Шунингдек, ўсимлик бошоқлари таркибида опий гуруҳига кирувчи, кучли қарамликни ва соғлиққа қайта тикланмас зарар етказувчи фаол гиёҳвандлик моддаси — морфин мавжудлиги тасдиқланди.

Ҳолат юзасидан Пискент тумани ИИБ ҳузуридаги Тергов бўлими томонидан жиноят иши қўзғатилди. Ушбу воқеа огоҳлик ва ҳушёрлик туйғусини янада ошириш лозимлигини яққол кўрсатиб берди.

Ички ишлар органлари ходимларининг ўз вақтида кўрган тезкор чора-тадбирлари натижасида заҳри қотилнинг қора бозорга чиқиб кетиши ҳамда юзлаб инсонлар, айниқса, ёшлар ҳаётига таҳдид солишининг олди олинди.

Хулоса ўрнида таъкидлаш жоизки, кенг жамоатчилик ва ҳуқуқ-тартибот органларининг фаол ҳамкорлиги орқали гиёҳвандликка қарши самарали курашиш мумкин. Зеро, соғлом келажак ва оилаларимиз осойишталиги ўз қўлимизда.

©️ “Postda” газетаси, Аброр Поёнов, катта мутахассис-мухбир, катта сержант. Тошкент вилояти.