Сурхондарё вилояти ИИБда маҳаллаларда хавфсиз муҳитни яратиш, қўриқлаш, ҳуқуқбузарликлар профилактикаси ва жиноятчиликка қарши курашиш масалалари танқидий таҳлил қилинди
2026-06-13 16:00:00 / Янгиликлар
Сурхондарё вилояти Ички ишлар бошқармасида маҳаллаларда хавфсиз муҳитни яратиш, аҳоли хавфсизлигини таъминлаш, қўриқлаш хизмати бўйича берилган топшириқлар ижроси, хизмат интизоми ва қонунчилик ҳамда соҳадаги мавжуд муаммоларни бартараф этиш мақсадида танқидий руҳдаги видеоселектор йиғилиши ўтказилди.
Йиғилиш, вилоят ички ишлар бошқармаси бошлиғи, полковник Тимур Исмаилов ҳамда вилоят прокурори Бахтияр Бабаджановлар раҳбарлигида бўлиб ўтди, унда вилоят ва туман масъуллари иштирок этишди.
Йиғилиш давомида Ўзбекистон Республикаси Президентининг ПҚ-1 ва ПҚ-2 сонли қарорлари ижроси доирасида амалга оширилаётган ишлар атрофлича муҳокама қилиниб, ҳудудларда жиноят ва ҳуқуқбузарликларни барвақт олдини олиш ҳамда аҳоли билан манзилли ишлаш самарадорлиги таҳлил этилди.
Шунингдек, бугунги кунда ўзининг ижобий натижалари билан эътибор қозонаётган «Чилонзор тажрибаси» ва «Мирзо Улуғбек тумани тажрибаси» асосида олиб борилаётган чора-тадбирларнинг ижроси кўриб чиқилди. Фуқароларнинг мурожаатлари билан ишлаш, ариза ва шикоятларни ўз вақтида ва сифатли ўрганиш, аҳолини қийнаётган муаммоларга тезкор ечим топиш масалаларига алоҳида эътибор қаратилди.
Йиғилишда профилактика инспекторлари томонидан дастлабки суриштирув жараёнларида йўл қўйилаётган айрим хато ва камчиликлар танқидий муҳокама қилиниб, уларни бартараф этиш бўйича аниқ вазифалар белгилаб берилди. Шу билан бирга, қонунчилик талабларига қатъий риоя этиш, хизмат интизомини мустаҳкамлаш ва хизмат фаолияти самарадорлигини янада ошириш юзасидан масъулларга тегишли кўрсатмалар берилди.
Бундан ташқари, қўриқлаш хизмати бўйича берилган топшириқлар ижроси, хонадон, ижтимоий соҳа ва савдо объектларини қўриқловга олиш, кибержиноятларга қарши курашиш, интернет орқали содир этилаётган фирибгарлик ҳолатларининг олдини олиш, аҳолининг киберхавфсизлик бўйича ҳуқуқий саводхонлигини ошириш ҳамда йўл-транспорт ҳодисаларини камайтиришга қаратилган профилактик чора-тадбирлар ҳам муҳокама марказида бўлди.
Йиғилиш якунида соҳадаги камчиликларни бартараф этиш, жиноятчилик ва ҳуқуқбузарликларни олдини олиш, қўриқлаш йўналиши, ижро интизоми, аҳоли мурожаатлари билан ишлаш сифатини ошириш ҳамда хизмат интизомини янада мустаҳкамлаш бўйича масъул раҳбар ва ходимларга аниқ топшириқлар берилди.
Зеро, тинч ва осойишта ҳаётни таъминлаш, ҳар бир фуқаронинг ҳуқуқ ва манфаатларини ҳимоя қилиш йўлида тизимли ва самарали фаолият муҳим аҳамият касб этади.
Сурхондарё вилояти ИИБ Ахборот хизмати