Янгиҳаёт тумани ИИО ФМБ Пробация бўлими рўйхатида турувчи ёшлар иштирокида “Раҳбар ва ёшлар учрашуви” бўлиб ўтди
2026-06-13 13:50:00 / Янгиликлар
Унда ИИВ Пробация хизмати бошлиғи, полковник А. Ураков, туман ИИО ФМБ бошлиғи, подполковник И. Тиллаев ҳамда бошқа мутасаддилар қатнашди.
Кун тартибида туман Пробация гуруҳи томонидан жорий йилнинг 5 ойи давомида амалга оширилган ишлар таҳлил қилинди. Маърузачилар юртимизда ёшларга оид давлат сиёсатининг асосларини ташкил этувчи қонуннинг мазмун-моҳиятига эътибор қаратдилар. Қонуннинг мақсади ёшларнинг ижтимоий шаклланиши, камол топиши, иқтидорининг жамият манфаатлари йўлида тўла намоён бўлиши учун ижтимоий-иқтисодий, ҳуқуқий ва ташкилий шарт-шароитлар яратиш ҳамда уларни кафолатлашдан иборат эканлиги таъкидланди.
Учрашувда иштирок этаётган ёшлар билан яқиндан суҳбатлашилиб, уларнинг муаммолари ўрганилди. Ҳар бир ёшнинг мурожаатига эътибор қаратилиб, уларни ҳал этиш ва қўллаб-қувватлаш бўйича тегишли ҳуқуқий тушунтиришлар берилди.
Шунингдек, йиғилишда соғлом турмуш тарзини ва тўғри ҳаёт йўлини танлаган ёшларга китоблар тақдим этилди.
Йиғилиш сўнгида туман Пробация бўлими рўйхатида турувчи ёшлар ўртасида жиноятчилик ва ҳуқуқбузарликларнинг олдини олиш, қайта жиноят содир этилишига йўл қўймаслик, улар билан манзилли ишлаш ҳамда тузалиш йўлига ўтган ёшларни қўллаб-қувватлаш борасида тегишли қарор қабул қилинди.
Бу каби ҳаётда билиб-билмай хатога йўл қўйган, аммо қилмишидан чин дилдан пушаймон бўлиб, соғлом турмуш тарзи, ҳалоллик ва тўғри ҳаёт йўлини танлаган ёшларга имконият яратишга қаратилган хайрли ишлар пойтахтнинг барча туманларида амалга оширилмоқда.
Тошкент шаҳар ИИББ Ахборот хизмати