Фуқаролар мурожаатлари диққат марказида: Андижонда ИИВ раҳбарияти аҳоли учун сайёр қабул ўтказди
2026-06-13 13:20:00 / Янгиликлар
Қабул давомида вилоятнинг турли ҳудудларидан келган фуқароларнинг мурожаатлари диққат билан тингланиб, ҳар бир масала атрофлича ўрганилди. Ҳуқуқбузарликлар профилактикаси, йўл ҳаракати хавфсизлиги, жамоат тартибини сақлаш ҳамда пробация соҳаларига оид муаммолар юзасидан аниқ чоралар белгилаб берилди.
Айниқса, маҳаллаларда тинчлик ва осойишталикни мустаҳкамлаш, профилактика инспекторлари фаолияти самарадорлигини ошириш, йўлларда хавфсиз ҳаракатни таъминлаш ҳамда ижтимоий ҳимояга муҳтож шахсларни қўллаб-қувватлашга қаратилган мурожаатлар алоҳида эътибор марказида бўлди.
Ҳар бир мурожаат ортида инсон тақдири, унинг орзу-умидлари ва эртанги кунга бўлган ишончи тургани таъкидланиб, муаммоларнинг бир қисми жойида ҳал этилди. Қўшимча ўрганиш талаб этадиган масалалар бўйича эса масъул раҳбарларга аниқ топшириқлар берилиб, ижроси қатъий назоратга олинди.
Бевосита мулоқот ва очиқ суҳбатлар аҳоли билан давлат органлари ўртасидаги ишонч кўпригини янада мустаҳкамламоқда. Зеро, халқнинг дардини эшитган, муаммосини ҳал қилишга интиладиган тизимгина жамиятда тинчлик, хавфсизлик ва адолатни таъминлай олади.
Бундай қабуллар инсон манфаатларини таъминлаш, фуқароларнинг давлат органларига бўлган ишончини янада ошириш ҳамда жамоат хавфсизлигини мустаҳкамлаш йўлида муҳим аҳамият касб этмоқда.