Ўзбекистон ММА ассоциацияси раҳбарияти томонидан спортчилар ўртасида тартиб-интизом ва спорт этикасига риоя этилиши юзасидан танқидий йиғилиш ўтказилди
2026-06-11 16:00:00 / Янгиликлар
Учрашувнинг асосий мақсади, халқ орасида машҳур бўлган медиа спортчиларнинг ижтимоий тармоқлардаги фаолияти, спорт этикаси ҳамда рақибларга нисбатан ҳурмат тамойилларига риоя этиш масалаларини муҳокама қилишдан иборат бўлди.
Йиғилиш давомида кейинги вақтларда ижтимоий тармоқларда айрим спортчилар томонидан рақибларга нисбатан ноўрин ва ҳақоратомуз сўзлар ишлатилиши ҳолатлари кузатилаётгани таъкидланди. Бу каби хатти-ҳаракатлар нафақат спортчининг шахсий обрўсига, балки у вакиллик қилаётган клуб, жамоа ҳамда бутун спорт турининг нуфузига салбий таъсир кўрсатиши қайд этилди ва айрим спортчиларга огоҳлантиришлар берилди.
Ассоциация раиси ўринбосари ўз сўзида ММА нафақат куч ва маҳорат, балки юқори маданият, интизом ва ҳурматни ҳам талаб қиладиган спорт тури эканини алоҳида таъкидлади. У спортчиларни ижтимоий тармоқларда фикр билдиришда масъулиятли бўлишга чақириб, ҳар қандай баҳс-мунозараларда ахлоқ меъёрларига амал қилиш зарурлигини билдирди.
Шунингдек, йиғилишда спортчиларнинг омма олдидаги масъулияти ҳақида ҳам сўз юритилди. Бугунги кунда кўплаб ёшлар машҳур спортчиларни ўзига намуна сифатида қабул қилади. Шу сабабли ҳар бир спортчининг сўзи ва ҳаракати ёш авлод тарбиясига таъсир кўрсатиши мумкинлиги таъкидланди. Рақибга нисбатан ҳурматсиз муносабат ёки ҳақоратли чиқишлар ёшларда нотўғри тушунчалар шаклланишига сабаб бўлиши мумкинлиги айтилди.
Йиғилиш якунида спортчилар ўртасида ўзаро ҳурмат муҳитини мустаҳкамлаш, спорт одобига қатъий риоя қилиш ва ижтимоий тармоқларда маданиятли мулоқотни йўлга қўйиш бўйича тегишли тавсиялар берилди. Шу билан бирга, келгусида бундай ҳолатларнинг олдини олиш мақсадида тушунтириш ишларини мунтазам равишда олиб бориш режалаштирилгани маълум қилинди.
Мутасаддиларнинг таъкидлашича, ҳақиқий спортчи нафақат ринг ёки октагондаги ғалабаси, балки ўзининг маданияти, одоби ва рақибларга бўлган ҳурмати билан ҳам намуна бўлиши лозим. Спортнинг асосий қадриятлари ҳам айнан ана шу тамойилларга таянади.
ИИВ «ЖАР» спорт-соғломлаштириш комплекси Ахборот хизмати