Ўзбекистон Республикаси Ички ишлар вазирлиги

Ички ишлар вазирлиги ҳузуридаги Қўриқлаш департаменти бошлиғи томонидан Андижон вилоятида Қўриқлаш хизмати фаолияти самарадорлиги, қўриқловга олинган объектларда хавфсизлик чораларининг таъминланиши ҳамда соҳада амалга оширилаётган ишлар ҳолати ўрганилди.

Ўрганишлар давомида ҳудудий қўриқлаш бўлинмаларининг хизматни ташкил этиш ҳолати, тезкор ҳаракатланувчи гуруҳларнинг шайлиги, бошқарув марказлари фаолияти, техник қўриқлаш воситаларидан самарали фойдаланиш, шунингдек, қўриқдаги объектларда содир этилиши мумкин бўлган ҳуқуқбузарлик ва фавқулодда ҳолатларнинг олдини олишга қаратилган профилактик чора-тадбирлар таҳлил қилинди.

Хусусан, объектларда ўрнатилган видеокузатув камералари, ташвиш хабарини узатиш қурилмалари, кириш-чиқиш назорати тизимлари ҳамда бошқа техник воситаларнинг ишлаш ҳолати кўздан кечирилди. Масъул ходимлар билан суҳбатлар ўтказилиб, хизмат интизоми, фуқаролар ва тадбиркорлик субъектларига кўрсатилаётган хизматлар сифати ҳамда тезкорликни янада ошириш масалаларига алоҳида эътибор қаратилди.

Шунингдек, қўриқловга олинган объектлар раҳбарлари билан учрашувлар ташкил этилиб, мавжуд муаммолар, таклифлар ва келгусида хавфсизликни кучайтириш бўйича амалга оширилиши лозим бўлган вазифалар муҳокама қилинди. Объектларнинг хусусиятидан келиб чиқиб, қўриқлов режаларини такомиллаштириш, хавфсизлик даражасини ошириш ва замонавий техник воситаларни кенг жорий этиш бўйича тегишли кўрсатмалар берилди.

Ташриф давомида Қўриқлаш хизмати ходимларининг касбий тайёргарлиги, хизмат вазифаларини бажаришдаги масъулияти ҳамда тезкор ҳаракатланувчи гуруҳларнинг чақирувларга ҳозиржавоблиги ҳам ўрганилди. Ходимларга жамоат тартибини сақлаш, мулк дахлсизлигини таъминлаш, фуқаролар мурожаатларига тезкор ва сифатли ёндашиш борасида аниқ вазифалар белгилаб берилди.

Қайд этилдики, Қўриқлаш департаментининг асосий мақсади — фуқаролар, тадбиркорлик субъектлари ва ташкилотларга ишончли, тезкор ва самарали қўриқлов хизматларини кўрсатиш, қўриқдаги объектларда хавфсиз муҳитни таъминлаш ҳамда ҳуқуқбузарликларнинг барвақт олдини олишдан иборат.

Ўрганиш якунида Андижон вилоятида Қўриқлаш хизмати фаолияти самарадорлигини янада ошириш, хизмат жараёнларига инновацион ечимларни кенг татбиқ этиш, ходимларнинг касбий маҳоратини юксалтириш ва объектларда хавфсизлик чораларини кучайтириш бўйича масъулларга тегишли топшириқлар берилди.