Жиззах вилояти ИИБ раҳбарияти томонидан ҳудудлардаги ободонлаштириш, қурилиш ва ижтимоий объектлар фаолияти ўрганилди
2026-06-09 10:00:00 / Янгиликлар
Жиззах вилояти ИИБ раҳбарияти томонидан Зарбдор ва Дўстлик туманларидаги ички ишлар органлари объектлари ҳамда ижтимоий аҳамиятга эга муассасаларда амалга оширилаётган ишлар ўрганилди.
Ташриф давомида Зарбдор тумани ИИБ маъмурий биноси ҳудудида олиб борилаётган ободонлаштириш ишлари кўздан кечирилди.
Яшил майдонлар ҳолати, манзарали ва мевали дарахтлар, гул кўчатларини экиш ва парваришлаш ишлари таҳлил қилиниб, ҳудуднинг экологик ҳамда эстетик қиёфасини янада яхшилаш, кўчатларни сифатли парваришлаш ва ободонлаштириш ишларини изчил давом эттириш бўйича масъулларга тегишли кўрсатмалар берилди.
Шунингдек, ходимларга хизмат кўрсатиб келаётган «Қалқон» ошхонасидаги шарт-шароитлар ҳамда туман марказидаги озиқ-овқат ва деҳқон бозори фаолияти ўрганилди.
Бозорда сотувчи ва харидорлар учун яратилган қулайликлар, маҳсулотлар таъминоти, нарх-наво барқарорлиги, санитария-гигиена талабларига риоя этилиши ва озиқ-овқат маҳсулотлари сифатига алоҳида эътибор қаратилди.
ИИБ раҳбарияти ИИВ «Динамо» жисмоний тарбия ва спорт жамияти Жиззах вилояти кенгаши биносида олиб борилаётган қурилиш-таъмирлаш ишларининг бориши билан ҳам танишди.
Мутасаддилар томонидан бажарилган ишлар ва келгусида амалга оширилиши режалаштирилган лойиҳалар юзасидан ахборот берилди.
Объектдан самарали фойдаланиш, спорт инфратузилмасини такомиллаштириш ва ходимлар учун замонавий машғулот шароитларини яратиш масалалари муҳокама қилиниб, қурилиш ишларини белгиланган муддатларда ва сифат талаблари асосида якунлаш бўйича масъулларга аниқ вазифалар юклатилди.
Шу билан бирга, Дўстлик тумани ИИБ маъмурий биноси атрофида амалга оширилаётган ободонлаштириш ишлари ҳам ўрганилди. Таҳлиллар давомида аниқланган айрим камчиликлар юзасидан масъулларга тегишли топшириқлар берилди.
Ташрифлар чоғида мавсумий долзарб масалалар ҳам муҳокама қилиниб, ғалла ўрим-йиғим жараёнларида хавфсизликни таъминлаш, ҳуқуқбузарликларнинг олдини олиш ва жамоат тартибини сақлаш чораларини янада кучайтириш юзасидан тегишли вазифалар белгилаб берилди.
Жиззах вилояти ИИБ Ахборот хизмати